பேட்டர்களை வதம் செய்யும் அசுரன் பும்ரா: மறக்கமுடியாத 10 தருணங்கள்

“ஓ ஜஸ்பிரித் பும்ரா, என்னுடைய அழகான சகோதரா உலகக் கிரிக்கெட்டின் தலைசிறந்த பந்துவீச்சாளரே. இங்கிலாந்து அணியை நீங்கள் சிதறடிக்கும் காட்சியை எங்களால் பார்க்க முடியவில்லையே”

ஆங்கிலத்தில் வார்த்தைகளை அமைத்து, பிரிட்டிஷ் ராக்பாடகர் கிறிஸ் மார்டின் தனது அகமதாபாத் இசைக்கச்சேரியில், இந்திய அணியின் வேகப்பந்துவீச்சாளர் ஜஸ்பிரித் பும்ராவைப் புகழ்ந்து பாடியுள்ளார்.

கடந்த ஆண்டில் தென் ஆப்பிரிக்கா, வங்கதேசம், நியூசிலாந்து, ஆஸ்திரேலியா என அனைத்து நாடுகளின் பேட்டர்களையும் தனது துல்லியமான லைன் லென்த் பந்துவீச்சால் அலறவிட்டவர் பும்ரா.

இந்தநிலையில், 2024-ஆம் ஆண்டுக்கான ஐசிசி கிரிக்கெட்டர் (ICC Cricketer Of The Year 2024) விருதை ஜஸ்பிரித் பும்ரா வென்றுள்ளார்.

கடந்த 2024-ஆம் ஆண்டில் மட்டும், 13 டெஸ்ட் போட்டிகளில் விளையாடி 71 விக்கெட்டுகளை பும்ரா எடுத்துள்ளார். இதில் இவரின் சராசரி 14.92, ஸ்ட்ரைக் ரேட் 30.16.

2024 ஆண்டு முழுவதும் பும்ரா டெஸ்ட் போட்டிகளில் 357 ஓவர்களை வீசி, 2.96 எக்கானமி ரேட் வைத்துள்ளார், அதாவது ஓவருக்கு 2.96 ரன்கள் தான் வழங்கியுள்ளார்.

இதற்கு முன் உலகக் கிரிக்கெட்டில் 70 விக்கெட்டுகளுக்கு மேல் குவித்த வீரர்கள் வைத்திருந்த சராசரியைவிட இது குறைவு.

2024ஆம் ஆண்டின் சிறந்த டெஸ்ட் வீரர்

ஒரு காலண்டர் ஆண்டில் 70 விக்கெட்டுகளுக்கு மேல் குவித்த 4வது இந்தியப் பந்துவீச்சாளர் என்ற பெருமையை பும்ரா பெற்றுள்ளார். இதற்கு முன் ரவிச்சந்திர அஸ்வின், அனில் கும்ப்ளே, கபில் தேவ் இந்த சாதனையை படைத்துள்ளனர்.

பும்ராவின் சாதனையைப் பாராட்டி சர்வதேச கிரிக்கெட் கவுன்சில் (ஐசிசி) அவருக்கு 2024ம் ஆண்டின் சிறந்த டெஸ்ட் வீரருக்கான விருதை நேற்று அறிவித்திருந்தது. இந்தநிலையில் இன்று மற்றொரு விருதையும் பும்ரா வென்றுள்ளார்

இந்திய அளவில் ஐசிசி சிறந்த கிரிக்கெட் வீரருக்கான விருதை பெறும் 5வது வீரராக பும்ரா உள்ளார். இதற்கு முன் ராகுல் திராவிட் (2004), சச்சின் டெண்டுல்கர் (2010), ரவிச்சந்திர அஸ்வின்(2016), விராட் கோலி (2017, 2018) ஆகியோர் பெற்றுள்ளனர்.

சர்வதேச கிரிக்கெட்டில் பும்ரா அறிமுகமாகி 8 ஆண்டுகள் ஆகின்றன. இதில் டெஸ்ட் போட்டியில் 45 போட்டிகளில் 205 விக்கெட்டுகளையும், ஒருநாள் போட்டிகளில் 89 ஆட்டங்களில் 149 விக்கெட்டுகளையும், 70 டி20 போட்டிகளில் 89 விக்கெட்டுகளையும் வீழ்த்தியுள்ளார்.

‘முதல் விக்கெட்’

எல்லோருடைய வாழ்க்கையிலும், வேலை, தொழில், வர்த்தகம் என்று எதைச் செய்தாலும் ‘முதல் செயல்’ என்பது முக்கியமானது. அந்த வகையில் பும்ராவுக்கு டெஸ்ட், ஒருநாள், மற்றும் டி20 போட்டிகளில் முதல் விக்கெட் மறக்க முடியாதது.

டெஸ்ட் கிரிக்கெட்டில், தென் ஆப்பிரிக்க பேட்டர் டீ வில்லியர்ஸ் விக்கெட்டை க்ளீன் போல்டாக வைத்து, பும்ரா 2018-ஆம் ஆண்டு முதல் விக்கெட்டை வீழ்த்தினார்.

2016-ஆம் ஆண்டு ஆஸ்திரேலியாவுக்கு எதிராக ஒருநாள் போட்டியில் அறிமுகமாகிய பும்ரா, ஸ்டீவ் ஸ்மித்தை ஆட்டமிழக்கச் செய்ததன் மூலம் முதல் விக்கெட்டை சாய்த்தார்.

அதேபோல டி20 போட்டியில் ஆஸ்திரேலிய பேட்டர் டேவிட் வார்னர் விக்கெட்டை வீழ்த்தி டி20 போட்டியில் முதல் விக்கெட்டை பும்ரா கைப்பற்றினார்.

ஒருநாள் போட்டியில் 6 விக்கெட்

2022-ஆம் ஆண்டு ஜூலை 12-ஆம் தேதி ஓவல் மைதானத்தில் இங்கிலாந்துக்கு எதிரான ஒருநாள் போட்டியில் பும்ராவின் பந்துவீச்சை யாராலும் மறக்க முடியாது.

இந்த போட்டியில் இந்திய அணியின் வெற்றியை பும்ரா தனது தோளில் சுமந்தார் எனக் கூறலாம்.

ஏனென்றால், இந்திய அணி 10 விக்கெட் வித்தியாசத்தில் இங்கிலாந்தை அதன் சொந்த மண்ணில் புரட்டி எடுக்க பும்ராவின் துல்லியமான பந்துவீச்சுதான் காரணம்.

இங்கிலாந்து பேட்டர்களை திணறவைத்த பும்ரா, 7.2 ஓவர்கள் வீசி 19 ரன்கள், 3 மெய்டன் ஓவர்கள் வீசி 6 விக்கெட்டுகளைச் சாய்த்தார். 25.2 ஓவர்களில் இங்கிலாந்து 110 ரன்களுக்கு ஆட்டமிழந்தது.

ஷமியுடன் இணைந்து பார்ட்னர்ஷிப்

2021-ஆம் ஆண்டில் லாட்ஸ் மைதானத்தில் இங்கிலாந்துக்கு எதிராக நடந்த 2வது டெஸ்ட் போட்டியில் பும்ராவின் பேட்டிங் மறக்க முடியாத தருணமாக இருக்கிறது. ஒரு வேகப்பந்துவீச்சாளராக மட்டும் பார்த்த பும்ராவை, டெய்லெண்டர் பேட்டராக அந்த ஆட்டத்தில் காண முடிந்தது.

அற்புதமாக ஆடிய ஷமி அரைசதம் அடித்து 56 ரன்களும், பும்ரா 34 ரன்களும் சேர்த்து ஆட்டமிழக்காமல் இருந்தனர்.

209 ரன்களுக்கு இந்திய அணி 9 விக்கெட்டுகளை இழந்தநிலையில் இருவரும் சேர்ந்து 91 ரன்கள் பார்ட்னர்ஷிப் அமைத்துக் கொடுத்து இந்திய அணியை முன்னிலை பெறச் செய்தனர். இந்த டெஸ்டில் இந்திய அணி 151 ரன்கள் வித்தியாசத்தில் வென்றது.

டெஸ்ட் போட்டியில் ஹாட்ரிக்

2019-ஆம் ஆண்டு கிங்ஸ்டனில் மேற்கிந்தியத்தீவுகள் அணிக்கு எதிராக நடந்த 2வது டெஸ்ட் போட்டியில் பும்ரா முதல்முறையாக டெஸ்ட் போட்டியில் ஹாட்ரிக் விக்கெட்டுகளை வீழ்த்தினார்.

இந்த போட்டியில் 257 ரன்கள் வித்தியாசத்தில் இந்திய அணி வெல்ல பும்ராவின் பந்துவீச்சு துருப்புச்சீட்டாக இருந்தது.

முதல் இன்னிங்ஸில் மே.இ.தீவுகள் அணியை 117 ரன்களில் சுருட்டியதில் பும்ராவின் பந்துவீச்சு குறிப்பிடத்தக்கது. இந்த ஆட்டத்தில் 12.1 ஓவர்கள் வீசிய பும்ரா 3 மெய்டன் ஓவர்கள் வீசி 27 ரன்கள் கொடுத்து ஹாட்ரிக் விக்கெட்டுகளுடன் 6 விக்கெட்டுகளைக் கைப்பற்றினார், 2வது இன்னிங்ஸில் ஒரு விக்கெட் என 7 விக்கெட்டுகளை வீழ்த்தினார்.

பாகிஸ்தான் பேட்டர்களை மிரள வைத்த பந்துவீச்சு

2023 உலகக் கோப்பையில் இந்தியா-பாகிஸ்தான் இடையிலான ஆட்டம் அகமதாபாத்தில் நடந்தது. இந்த ஆட்டத்தில் இந்திய அணி 7 விக்கெட் வித்தியாசத்தில் வென்றது. இதில் பும்ரா 2 விக்கெட்டுகள் மட்டுமே எடுத்தாலும் அந்த இரு விக்கெட்டுகளும் ஆகச்சிறந்தவை.

பும்ரா வீசிய பந்து எப்படி க்ளீன் போல்டாக்கியது, எப்படி பெயில்ஸை தொட்டுச் சென்றது என்பது புரியாமல் பாகிஸ்தான் பேட்டர் முகமது ரிஸ்வான், சதாப்கான் இருவரும் பிரமிப்புடன் பும்ராவை பார்த்து செல்லும் காட்சிகள் நிழலாடுகிறது.

கால்காப்புக்கும், பேட்டுக்கும் இடையே புகுந்து பந்து போல்டாகிய லெக் கட்டர் வித்தை பும்ராவைத் தவிர யாராலும் நிகழ்த்த முடியாது. பும்ராவின் கிரிக்கெட் வாழ்க்கையில் ஆகச்சிறந்த பந்துவீச்சாக அது அமைந்தது.

ஒரே ஓவரில் 29 ரன்கள்

2022 எட்ஜ்பாஸ்டனில் நடந்த இங்கிலாந்துக்கு எதிரான 5-வது டெஸ்ட் போட்டியில் பும்ராவின் பேட்டிங்கை கண்டு வியக்காதவர்கள் யாருக்கும் இருக்க முடியாது.

இந்திய அணி அந்த டெஸ்டில் தோல்வி அடைந்தாலும், முதல் இன்னிங்ஸில் பும்ரா ஒரே ஓவரில் 29 ரன்கள் குவித்தார்.

ஸ்டூவர்ட் பிராட் 84வது ஓவரை வீசியபோது, பும்ரா முதல் பந்தில் (பவுண்டரி) 4 ரன்கள் எடுத்தார். 2வது பந்து வைடாகவே, அடுத்தபந்து நோபாலாக வீச அதை பும்ர சிக்ஸருக்கு பறக்கவிட்டார்.

அதன்பின் 2வது, 3வது, 4வது பந்துகளில் பும்ரா ஹாட்ரிக் பவுண்டரி அடித்தார். 5வது பந்தில் ஒரு சிக்ஸர் என 35 ரன்கள் சேர்க்கப்பட்டன, இதில் பும்ரா மட்டும் 29 ரன்கள் சேர்த்தார். அது பும்ராவால் எந்த சூழலிலும் பேட்டிங்கும் செய்ய முடியும் என்பதை வெளிப்படுத்திய தருணமாகும்.

ஒருநாள் போட்டியில் 5 விக்கெட்

2017-18ம் ஆண்டில் இந்திய அணி இலங்கைக்கு பயணித்தது. அதில் இலங்கை பேட்டர்களை தனது பந்துவீச்சால் துவம்சம் செய்த பும்ரா 10 ஓவர்கள் வீசி 27 ரன்கள் கொடுத்து 5 விக்கெட்டுகளை வீழ்த்தினார்.

பும்ராவின் பந்துவீச்சை சமாளிக்க முடியாமல் இலங்கை அணி 217 ரன்களில் சுருண்டுவிட அதை இந்திய அணியும் எளிதாக சேஸ் செய்து 6 விக்கெட் வித்தியாசத்தில் வென்றது.

உலகக் கோப்பை நாயகன்

2024 டி20 உலகக் கோப்பையை இந்திய அணி வெல்வதற்கு பந்துவீச்சில் முன்னெடுத்துச் சென்றவர் ஜஸ்பிரித் பும்ரா தான்.

தென் ஆப்பிரிக்காவுக்கு எதிரான இறுதிப் போட்டியில் பும்ரா எடுத்த 2 விக்கெட், பாகிஸ்தானுக்கு எதிராக எடுத்த 3 விக்கெட் ஆட்டத்தில் திருப்புமுனையை ஏற்படுத்தியது.

120 ரன்களை பாகிஸ்தான் அணியை சேஸ் செய்யவிடாமல் பும்ரா பந்துவீச்சில் அளித்த நெருக்கடி, துல்லியமான பந்துவீச்சு அந்த அணியை திக்குமுக்காடச் செய்தது. தொடக்க வீரர்கள் பாபர் ஆஸம், ரிஸ்வான் விக்கெட்டுகளை வீழ்த்தி வெற்றிக்கு காரணமாக பும்ரா இருந்தார்.

மறக்க முடியாத பார்டர் கவாஸ்கர் கோப்பை

2024-25 பார்டர் கவாஸ்கர் கோப்பைத் தொடரை இந்திய அணி 3-1 என இழந்தாலும், 5 போட்டிகளில் 32 விக்கெட்டுகளை வீழ்த்திய பும்ராவின் பந்துவீச்சு ஆஸ்திரேலிய பேட்டர்களுக்கு சிம்மசொப்பனமாக இருந்தது.

கடைசி டெஸ்டில் பும்ரா முதுகு வலியால் பந்துவீசவில்லை, ஒருவேளை பந்துவீசியிருந்தால் தொடர் சமனில் முடிந்திருக்கும் என்பது பலரின் கருத்தாக இருந்தது.

இந்த டெஸ்டில் பேட்டர்களின் பங்களிப்பு குறைவாக இருந்தது, ஆனால், ஒவ்வொரு போட்டியையும் பும்ரா தனது பந்துவீச்சால் சுமந்தார். முதல் போட்டிக்கு கேப்டன்ஷிப் ஏற்று, அதில் அவரின் துல்லியமான பந்துவீச்சை சமாளிக்க முடியாமல் ஆஸ்திரேலிய அணி தோற்றது.

அதன்பின் ஒவ்வொரு டெஸ்டிலும் பும்ராவின் பந்துவீச்சு ஆஸ்திரேலிய பேட்டர்களுக்கு ஈட்டி இறங்குவது போலத்தான் இருந்தது.

– இது, பிபிசிக்காக கலெக்டிவ் நியூஸ்ரூம் வெளியீடு