தமிழ் மக்களின் குரலாக ஒலிப்போம் : இரா.சாணக்கியன் on Friday, November 15, 2024
தமிழ் மக்களின் குரலாக, கட்சியாக தமிழரசு கட்சி செயற்படும் என மட்டக்களப்பு மாவட்ட பாராளுமன்ற உறுப்பினராக தெரிவு செய்யப்பட்டுள்ள இரா.சாணக்கியன் தெரிவித்தார்.
விருப்பு வாக்குகளின் எண்ணிக்கை வெளியிடப்பட்டதன் பின்னர், ஊடகங்களுக்கு கருத்து தெரிவிக்கும் போதே இதனைக்குறிப்பிட்டார்.
மேலும் குறிப்பிடுகையில், மட்டக்களப்பு மாவட்டத்தில் அதிகூடிய வாக்குகளைப் பெற்று தமிழரசு கட்சி மூன்று ஆசனங்களைப் பெற்றுக்கொண்டுள்ளது. கடந்த பாராளுமன்ற தேர்தலில் பார்க்கினும் தமிழரசு கட்சி இம்முறை சாதனை புரிந்துள்ளது. வடக்கு, கிழக்கில் உள்ள ஐந்து தேர்தல் மாவட்டங்களிலும் தமிழரசு கட்சி ஆசனங்களைப் பெற்றுள்ளது. இதன்மூலமாக மக்கள் தமிழரசு கட்சிக்கே ஆணையை வழங்கியுள்ளனர். இலங்கையில் மட்டக்களப்பு மாவட்டத்தில் மாத்திரமே அரசாங்க கட்சியை தவிர்ந்த தமிழரசுகட்சி வெற்றி பெற்றிருக்கின்றது.
இத்தேர்தலில் மட்டக்களப்பு மாவட்டத்து மக்கள், கடந்த காலங்களில் சமூக விரோதசெயல்களில் ஈடுபட்டவர்களை நிராகரித்திருக்கின்றனர். எப்போதும் தமிழ் மக்களின் குரலாக, கட்சியாக தமிழரசுகட்சி ஒலிக்கும். தமிழ் மக்களின் அரசியல் தீர்வு, இன அழிப்பிற்கான நீதி, காணி அபகரிப்பு நிறுத்தப்படல், அபிவிருத்தி போன்றவற்றிற்காக குரல் கொடுக்கும். என்றார். (P.P)