தம்புள்ளையில் விலையுயர்ந்த மாணிக்கக் கற்களுடன் நால்வர் கைது

தம்புள்ளையில் விலையுயர்ந்த மாணிக்கக் கற்களுடன் நால்வர் கைது மாத்தளை, தம்புள்ளை நகரத்தில் விலையுயர்ந்த 08 மாணிக்கக் கற்களுடன் நான்கு சந்தேக நபர்கள் நேற்று செவ்வாய்க்கிழமை (05) கைது செய்யப்பட்டுள்ளதாக தம்புள்ளை பொலிஸார் தெரிவித்தனர்.

தம்புள்ளை பொலிஸாருக்கு கிடைத்த தகவலின் அடிப்படையில், சந்தேகத்திற்கிடமான முறையில் பயணித்த கார் ஒன்றில் மேற்கொள்ளப்பட்ட சோதனையில் சந்தேக நபர்கள் கைது செய்யப்பட்டுள்ளனர்.

கைது செய்யப்பட்டவர்கள் மனம்பிட்டிய, பொலன்னறுவை, கண்டி மற்றும் ஹதரலியத்த ஆகிய பிரதேசங்களில் வசிக்கும் 43, 47, 52 மற்றும் 59 வயதுடையவர்கள் ஆவர்.

சந்தேக நபர்கள் நால்வரும் இந்த மாணிக்கக் கற்களை மற்றுமொரு நபருக்கு விற்பனை செய்வதற்குத் தயாராக இருந்துள்ளதாக பொலிஸ் விசாரணையில் தெரியவந்துள்ளது.

இது தொடர்பான மேலதிக விசாரணைகளை தம்புள்ளை பொலிஸார் மேற்கொண்டு வருகின்றனர்.