முன்னாள் ஜனாதிபதி மகிந்த ராஜபக்சவின்(mahinda rajapaksa) பாதுகாப்பிற்காக நியமிக்கப்பட்டிருந்த பாதுகாப்பு அதிகாரிகளின் எண்ணிக்கை 60 ஆக குறைக்கப்பட்டுள்ளது.
உயரடுக்கு பாதுகாப்பு உத்தியோகத்தர் நியமனக் குழுவினால் எடுக்கப்பட்ட தீர்மானத்தின் பிரகாரம், பதில் காவல்துறை மா அதிபர் பிரியந்த வீரசூரியவின் உத்தரவு மற்றும் பணிப்புரைக்கு அமைவாக விசேட பாதுகாப்புப் பிரிவின் பிரதி காவல்துறை மா அதிபரின் சிபாரிசுகள் அடங்கிய சுற்றறிக்கை ஒன்று வெளியிடப்பட்டுள்ளது.
மகிந்த ராஜபக்சவின் பாதுகாப்பிற்காக 60 அதிகாரிகள்
இதன்படி, முன்னாள் ஜனாதிபதி மகிந்த ராஜபக்சவின் பாதுகாப்பிற்காக 60 அதிகாரிகள், 2 ஜீப் வண்டிகள், 2 மோட்டார் சைக்கிள்கள் மற்றும் ஒரு முச்சக்கரவண்டி என்பன வழங்கப்பட்டுள்ளன.
பாதுகாப்பு பிரிவில் இருந்து நீக்கம் செய்யப்பட்ட அதிகாரிகளின் பட்டியலை, நாளை (2)க்கு முன், அந்த பிரிவுக்கு பொறுப்பான டி.ஐ.ஜி.யிடம் பெற்றுக் கொள்ள வேண்டும் என்றும், அதிக எண்ணிக்கையிலான வாகனங்களை, காவல்துறை போக்குவரத்து பிரிவில் நாளை மறுதினம் (3). ஒப்படைக்க வேண்டும் என்றும் சுற்றறிக்கையில் கூறப்பட்டுள்ளது.