மகா கும்பமேளா கூட்ட நெரிசலில் 12 பேர் உயிரிழந்ததாக தகவல் – நள்ளிரவில் என்ன நடந்தது?

உத்தரபிரதேச மாநிலம் பிரயாக்ராஜில் நடக்கும் மகா கும்பமேளாவில் கடும் கூட்ட நெரிசல் குறைந்தது 12 பேர் உயிரிழந்திருக்கலாம் என்று தகவல்கள் வெளியாகியுள்ளன. கும்பமேளாவில் உள்ள பிரதான மருத்துவமனைக்குள் ஆம்புலன்ஸ்கள் நுழைவதும், வெளியே செல்வதுமாக இருந்தாலும் ஊடகத்தினர் உட்பட யாரும் உள்ளே அனுமதிக்கப்படவில்லை.

உயிரிழப்புகள் நடந்திருப்பதை நேரில் கண்ட சாட்சிகளும் மருத்துவமனை வட்டாரங்களும் பிபிசியிடம் தெரிவித்துள்ளன. ஆனால், காயமடைந்தவர்கள் அல்லது உயிரிழந்தவர்கள் குறித்த எந்த தகவலும் அரசாங்க தரப்பில் இருந்து இன்னும் வெளியிடப்படவில்லை. கும்பமேளாவின் முக்கியமான புனித நாளான இன்று அதிக பக்தர்கள் திரள்வார்கள் என்று எதிர்பார்க்கப்பட்ட இடத்தில் நடந்துள்ள கூட்ட நெரிசல், தவறு எங்கே நடந்தது? என்ற பூதாகரமான கேள்விகளை எழுப்பியுள்ளது.

நள்ளிரவில் என்ன நடந்தது?

12 ஆண்டுகளுக்கு ஒருமுறை நடக்கும் கும்பமேளா இம்மாதம் ஜனவரி 13-ஆம் தேதி தொடங்கியது. மொத்தம் 45 நாட்கள் நடக்கும் இந்த கும்பமேளாவின் போது பிரயாக்ராஜில் உள்ள திரிவேணி சங்கமத்தில் பக்தர்கள் புனித நீராடுவது வழக்கம். அதிலும், ஷாஹி ஸ்னான் அதாவது நாக சாதுக்கள் நீராடும் மௌனி அமாவாசை தினமான இன்றைய கூடுதல் சிறப்பு வாய்ந்ததாக கருதப்படுகிறது. இன்றைய தினம் மட்டும் அங்கே சுமார் 10 கோடி பேர் திரள்வார்கள் என்று எதிர்பார்க்கப்படுவதாக அதிகாரிகள் தெரிவித்திருந்தனர்.

அதன்படியே, நாட்டின் பிற பகுதிகளில் இருந்து லட்சக்கணக்கான பக்தர்கள் பிரயாக்ராஜில் குவிந்தனர். நள்ளிரவு 1.30 மணியளவில் திடீரென கூட்ட நெரிசல் ஏற்பட்டது. இதில் பலரும் காயமடைந்தனர். இந்த கூட்ட நெரிசலில் சிக்கி பலர் உயிரிழந்துவிட்டதாக ஏ.எஃப்.பி. செய்தி முகமை கூறியுள்ளது.

சில இடங்களில் தடுப்புகளை மீறி மக்கள் சென்றதே நெரிசலுக்கு காரணம் என கும்பமேளா ஏற்பாடுகளை கவனிக்கும் அதிகாரி ஆகாங்ஷா ராணா தெரிவித்தார். எனினும், அங்கே நிலைமை கைமீறிப் போய்விடவில்லை என்றும் அவர் கூறினார்.

காயமடைந்த மக்கள் ஆம்புலன்ஸ் மூலம் மருத்துவமனைகளுக்குக் கொண்டு செல்லப்படும் வீடியோக்களை சமூக ஊடகமாமான எக்ஸ் தளத்தில் பார்க்க முடிகிறது.

இதையடுத்து, மௌனி அமாவாசை நிகழ்வுகள் தற்காலிகமாக நிறுத்திவைக்கப்பட்டிருப்பதாக அங்கிருந்து வரும் பல ஊடக தகவல்கள் கூறுகின்றன.

குறைந்தது 12 பேர் உயிரிழந்ததாக தகவல்

மகா கும்பமேளா கூட்ட நெரிசலில் குறைந்தது 12 பேர் உயிரிழந்ததாக நேரில் கண்ட சாட்சிகளும் மருத்துவமனை வட்டாரங்களும் பிபிசியிடம் தெரிவித்துள்ளன.

இருப்பினும், கும்பமேளாவில் என்ன நடந்தது என்பது குறித்தோ, உயிரிழப்புகளின் எண்ணிக்கை குறித்தோ அரசாங்கத்திடமிருந்து இன்னும் எந்த தகவலும் இல்லை.

கூட்ட நெரிசலில் உயிரிழந்தவர்களின் எண்ணிக்கை ஒரு டஜனுக்கும் அதிகமாக இருக்கலாம் என்று சுகாதார ஊழியர் ஒருவர் பிபிசியிடம் தெரிவித்தார்.

பெயரை குறிப்பிட விரும்பாத அந்த ஊழியர், விபத்து நடந்த இடத்தில் பல உடல்களைக் கண்டதாகக் கூறினார்.

நேரில் கண்டவர்கள் என்ன சொன்னார்கள்?

கூட்ட நெரிசலில் சிக்கிய ஒரு பெண், ஐ.ஏ.என்.எஸ். செய்தி முகமையிடம் பேசுகையில், தன்னைக் காப்பாற்றுமாறு பாதுகாப்புப் படையினரிடம் முறையிட்டதாகவும், ஆனால் நிர்வாகத்தைச் சேர்ந்த யாரும் தன்னைக் காப்பாற்ற வரவில்லை என்றும் கூறினார்.

கூட்ட நெரிசல் திடீரென ஏற்பட்டதாகவும், மக்கள் வெளியேற வழி கண்டுபிடிக்க முடியவில்லை என்றும் பி.டி.ஐ. செய்தி முகமையிடம் மற்றொரு பெண் தெரிவித்தார்.

சம்பவம் குறித்த விவரங்களைத் தெரிவிக்கும் போது, ​​மத்தியப் பிரதேசத்தின் சத்தர்பூரைச் சேர்ந்த மற்றொரு நபர், ‘அங்கு சரியான பாதுகாப்பு ஏற்பாடுகள் இல்லை, யாரும் உதவ வரவில்லை, பலர் காயமடைந்தனர்’ என்று கூறினார்.

தனது தாய் உயிருடன் இருக்கிறாரா இல்லையா என்பது தனக்குத் தெரியாது என்றும் அந்த நபர் கூறினார்.

ஊடகங்களுக்கு அனுமதி மறுப்பு

கும்பமேளாவில் உள்ள பிரதான மருத்துவமனைக்குள் காலை முழுவதும் ஆம்புலன்ஸ்கள்உள்ளே நுழைவதும், வெளியே செல்வதுமாக இருந்ததை பார்க்க முடிந்தது.

அந்த மருத்துவமனையைச் சுற்றிலும் பலத்த பாதுகாப்பு போடப்பட்டுள்ளது. ஊடகத்தினர் உட்பட யாரும் மருத்துவமனைக்குள் நுழைய அனுமதிக்கப்படவில்லை.

விஐபிக்களுக்கு முன்னுரிமை, பக்தர்கள் புறக்கணிப்பா?

மகா கும்பமேளாவில் ஏற்பட்ட நெரிசலில் உயிரிழப்புகள் ஏற்பட்டிருப்பதாக தகவல்கள் வந்துள்ள நிலையில், மக்கள் திரிவேணி சங்கமத்திற்குச் செல்ல வேண்டாம் என்றும், தங்கள் அருகிலுள்ள ஆற்றங்கரையில் குளிக்கலாம் என்றும் துறவிகளும் அதிகாரிகளும் கேட்டுக் கொண்டுள்ளனர்.

விஐபிகளுக்கு முன்னுரிமை அளித்து பக்தர்களுக்கு போதுமான ஏற்பாடுகளைச் செய்யத் தவறி விட்டதாக நிர்வாகத்தின் மீது பஞ்சாயத்தி அகாரா ஸ்ரீ நிரஞ்சனி அமைப்பின் தலைவர் பிரேமானந்த் பூரி குற்றம்சாட்டியுள்ளார்.

“நாங்கள் அனைவரும் அகாராக்கள் [பிரிவுகள்] அதை [கும்பமேளாவின் நிர்வாகத்தை] இந்திய இராணுவத்திடம் ஒப்படைக்க வேண்டும் என்று கோரியிருந்தோம். அப்படிச் செய்திருந்தால், இவ்வளவு பெரிய சோகம் நடந்திருக்காது என்று நான் நினைக்கிறேன், “என்று ஏ.என்.ஐ. செய்தி முகமையிடம் பேசிய அவர் கூறினார்.

எங்கே, என்ன தவறு நடந்தது? பூதாகரமாக எழும் கேள்விகள்

பிரயாக்ராஜ் நகரில் இருந்து நேரடியாக தகவல்களை அளிக்கும் பிபிசி செய்தியாளர் சமிரா ஹூசைன் பகிர்ந்து கொண்ட தகவல்கள் கீழே தரப்பட்டுள்ளன.

ஆற்றங்கரையில் பெரும் குழப்பம் நிலவியது. எங்கு பார்த்தாலும் மக்களின் உடைமைகள், உடைகள், காலணிகள், போர்வைகள் மற்றும் பைகள் சிதறிக்கிடந்தன. அப்புறப்படுத்தப்பட்ட பொருட்களுக்கு மத்தியில் சில உடல்கள் இருந்ததையும் பார்க்க முடிந்தது.

அங்கே, தகவல் பரிமாற்றத்தில் ஒரு வெற்றிடம் இருந்தது. என்ன நடந்தது அல்லது என்ன நடந்து கொண்டிருந்தது என்று யாருக்கும் தெரியவில்லை.

ஒரு ஸ்ட்ரெச்சருக்கு முன்னே ஒரு பெண் கண்ணீருடன் நடந்து சென்றதை கண்டேன். மற்றொரு ஆண் ஸ்ட்ரெச்சரின் அருகே நடந்து சென்று உடலை சால்வையால் மூட முயன்றார்.

இவை அனைத்தும் பக்தர்கள் புனித நீராட கூடும் முக்கிய இடத்தில் நடந்தது. குறிப்பாக, இந்த முக்கியமான புனித நாளில் அதிக எண்ணிக்கையிலான மக்கள் கூடுவார்கள் என்று அதிகாரிகள் அறிந்த இடத்தில் இந்த சம்பவம் நடந்தது.

எங்கே, என்ன தவறு நடந்தது? என்பது குறித்து கடுமையான கேள்விகள் கேட்கப்படும் என்று எதிர்பார்க்கப்படுகிறது.

இப்போதைக்கு, இறந்தவர்கள் அல்லது காயமடைந்தவர்களின் எண்ணிக்கையை அதிகாரிகள் உறுதிப்படுத்தவில்லை.

கும்பமேளாவில் இன்றைய தினத்தின் முக்கியத்துவம் என்ன?

குறிப்பிட்ட கிரகங்கள் மற்றும் விண்மீன்களின் அமைப்பின் அடிப்படையில், கும்பமேளாவுக்கான நீராடும் தேதிகள் மற்றும் நல்ல நேரங்கள் ஜோதிடர்களால் தீர்மானிக்கப்படுகின்றன.

அதன்படி, நடப்பு கும்பமேளாவில் புனித நீராட 6 நாட்கள் மிகவும் புனிதமானவையாக கருதப்பட்டன.

ஜனவரி 14 மற்றும் ஜனவரி 29 மற்றும் 3 பிப்ரவரி ஆகிய நாட்களில் ஷாஹி ஸ்னான் அதாவது நாக சாதுக்கள் நீராடுவர். இந்த மூன்று நாட்களும் புனித நாட்களாகக் கருதப்படுகின்றன.

அந்த 3 நாட்களிலும் கூட ஜனவரி 29-ம் தேதியான இன்றைய தினம் கூடுதல் சிறப்பு வாய்ந்தது. கும்பமேளாவில் மிகப்பெரிய அளவில் மக்கள் இன்றைய தினம் திரள்வார்கள் என்று எதிர்பார்க்கப்படுகிறது. சுமார் 10 கோடி பக்தர்கள் புனித நீராடுவார்கள் என்று மதிப்பிடப்பட்டுள்ளது.

எவ்வளவு பெரிய விழா இது?

இந்த செய்தி தொடர்ந்து புதுப்பிக்கப்படுகிறது.

– இது, பிபிசிக்காக கலெக்டிவ் நியூஸ்ரூம் வெளியீடு