கிழக்கு ஆளுநர் – வேலையற்ற பட்டதாரிகள் இடையே விசேட கலந்துரையாடல் !

கிழக்கு ஆளுநர் – வேலையற்ற பட்டதாரிகள் இடையே விசேட கலந்துரையாடல் ! on Monday, January 27, 2025

2024 ஆகஸ்ட் மாதம் மாகாண ஆசிரியர் போட்டிப் பரீட்சைக்குத் தோற்றி நேர்முகப் பரீட்சைக்கு தோற்றிய வேலையற்ற பட்டதாரிகள் குழுவுக்கும் கிழக்கு மாகாண ஆளுநர் பேராசிரியர் ஜயந்தலால் ரட்ணசேகரவுக்கும் இடையிலான கலந்துரையாடல் திருகோணமலையில் உள்ள ஆளுநர் செயலகத்தில் இன்று (27) நடைபெற்றது.

இதன்போது பட்டதாரிகள் பல கோரிக்கைகளின் அடிப்படையில் தங்கள் பிரச்சினைகளை முன்வைத்தனர்.

மேலும், அவர்களின் முக்கிய கோரிக்கைகளில் ஒன்று, பரீட்சை பெறுபேறுகள் எதிர்கால ஆட்சேர்ப்புக்கு அடிப்படையாக பயன்படுத்தப்பட வேண்டும் என்பதே ஆகும்.

இக்கலந்துரையாடலில் ஆளுநர், அத்தகைய கோரிக்கையை நிறைவேற்றுவதற்கான நிரந்தர தீர்வினை அவர்களால் வழங்க முடியாது என்றும், பட்டதாரிகளின் கோரிக்கைகள், சம்பந்தப்பட்ட துறைகளுக்கு சமர்ப்பிக்கப்படும் என்று தெரிவித்தார்.

இக்கூட்டத்தில் அவர் மேலும் கூறுகையில்,
இந்த நியமனங்களில் பல தரப்பினர் ஆர்வமாக இருப்பதால், அனைவருக்கும் நியாயமான முடிவு எடுக்கப்படும்.

நேர்முகத் தேர்வை எதிர்கொண்டவர்களின் பிரச்சினைகளை ஆராய்வதற்காக மாகாண கல்விச் செயலாளர், மாகாண பொதுச்சேவை ஆணைக்குழுவின் செயலாளர் மற்றும் மாகாண கல்விப் பணிப்பாளர் ஆகியோர் அடங்கிய மேன்முறையீட்டுக் குழு நியமிக்கப்பட்டுள்ளதால், வேலையில்லாப் பட்டதாரிகளின் பிரச்சினைகளை அவர்களிடம் சமர்ப்பிக்க வேண்டும் என்றும் தெரிவித்தார்.