வியாழக்கிழமை (09) நிலவரப்படி, லாஸ் ஏஞ்சல்ஸ் நகரில் பரவிய காட்டுத் தீயில் குறைந்தது 10 பேர் இறந்துள்ளனர் மற்றும் ஆயிரக்கணக்கான கட்டிடங்கள் அழிக்கப்பட்டதாக அமெரிக்க அதிகாரிகள் தெரிவித்தனர்.
வேகமாக நகரும் தீப்பிழம்புகள், கடுமையான வறண்ட காற்றால் தூண்டப்பட்டு, வீடுகள் மற்றும் வணிகங்களை தீக்கிரையாக்கியுள்ளன.
பிரபலங்கள் உள்ளிட்ட பல்லாயிரக்கணக்கான மக்கள் புகை மூட்டப்பட்ட குடியிருப்புகளிலிருந்து வெளியேற கட்டாயப்படுத்தப்பட்டனர்.
காட்டுத் தீ தொடர்ந்து எரிந்து வருவதால், லாஸ் ஏஞ்சல்ஸ் கவுண்டியின் மருத்துவ பரிசோதகர் வெள்ளிக்கிழமை இறந்தவர்களின் எண்ணிக்கை 10 ஆக உயர்ந்துள்ளது என்று கூறினார்.
லாஸ் ஏஞ்சல்ஸ் பகுதியில் பற்றி எரியும் நான்கு பெரிய காட்டுத் தீயில் ஒன்றான ஈட்டன் தீயில் பலியானவர்களில் எண்ணிக்கை 5 ஆக உயர்ந்தது.
மீட்பு பணிகள் தொடர்வதால் எண்ணிக்கை உயரும் என்று அதிகாரிகள் அச்சம் வெளியிட்டுள்ளனர்.
அதேநேரம், பசுபிக் பாலிசேட்ஸ் தீயானது பெரும்பாலும் குடியிருப்பு பகுதிகளை அழித்தது, 200 ஏக்கர் முழுவதும் பரவியது மற்றும் கட்டாய வெளியேற்றல் உத்தரவுகளுக்கும் அது வழிவகுத்தது.
பசுபிக் பாலிசேட்ஸில் மட்டும் 5,000 க்கும் மேற்பட்ட கட்டிடங்கள் சேதமடைந்துள்ளன அல்லது அழிக்கப்பட்டன, இது லாஸ் ஏஞ்சல்ஸ் வரலாற்றில் மிகவும் அழிவுகரமான தீயாக அமைந்தது.
கடலோரப் பகுதியில் கிட்டத்தட்ட 27 சதுர மைல்கள் (70 சதுர கிமீ) எரிந்துள்ளன.
வியாழன் நிலவரப்படி, சுமார் 180,000 பேர் வெளியேற்ற உத்தரவுகளின் கீழ் இருந்தனர்.
கலாபாசாஸ், சாண்டா மோனிகா மற்றும் வெஸ்ட் ஹில்ஸ் போன்ற ஆடம்பரமான சுற்றுப்புறங்கள் தீப்பிழம்புகளால் அச்சுறுத்தப்பட்டன.
இடம்பெயர்ந்தவர்களில் மார்க் ஹாமில், மாண்டி மூர், பாரிஸ் ஹில்டன் உள்ளிட்ட ஹெலிவுட் நட்சத்திரங்களும் அடங்குவர்.
லாஸ் ஏஞ்சல்ஸ் கவுண்டி முழுவதும் சுமார் 45 சதுர மைல்கள் (117 சதுர கிமீ) தீ பற்றி எரிந்துள்ளது, இது சான் பிரான்சிஸ்கோவின் அளவிற்கு சமமானது.
தீயணைப்பு வீரர்கள், சட்ட அமலாக்கப் பணியாளர்கள் மற்றும் அவசர உதவிப் பணியாளர்கள் உட்பட 7,500-க்கும் மேற்பட்ட பணியாளர்கள் தீயை அணைக்கும் பணியில் ஈடுபட்டுள்ளனர்.
ஓரிகான், வொஷிங்டன், உட்டா, நியூ மெக்சிகோ மற்றும் அரிசோனா ஆகிய இடங்களில் இருந்து கூடுதல் குழுக்கள் அனுப்பப்பட்ட நிலையில், கலிபோர்னியா 1,400 தீயணைப்பு வீரர்களை அனுப்பியுள்ளது.
அமெரிக்க ஜனாதிபதி ஜோ பைடன் தீயை எதிர்த்துப் போராடுவதற்கு கூட்டாட்சி வளங்கள் மற்றும் நிதியுதவியை அங்கீகரித்தார்.
புதிய நிதியானது அபாயகரமான பொருட்களை அகற்றுதல், தங்குமிடங்கள், முதல் பதிலளிப்பவரின் சம்பளம் மற்றும் 180 நாட்களுக்கு பாதுகாப்பு நடவடிக்கைகளுக்கான 100% செலவுகளை ஈடுசெய்யும்.
இதனிடையே, தனியார் வானிலை நிறுவனமான AccuWeather, தீயினால் ஏற்பட்ட பொருளாதார சேதம் மற்றும் இழப்புகளை $135 பில்லியன் முதல் $150 பில்லியன் வரை என மதிப்பிட்டுள்ளது.
எனினும், அரசாங்கத்தின் உத்தியோகபூர்வ மதிப்பீடுகள் இன்னும் நிலுவையில் உள்ளன.
சில பகுதிகளில் மணிக்கு 70 மைல் (112 கிமீ) வேகத்தில் வீசிய சக்திவாய்ந்த காற்றினால் தீப்பரல் தீவிரமடைந்தது.
கடந்த நாட்களை விட காற்றின் வேகம் குறைந்தாலும் தீ வேகமாக பரவக்கூடும் என்று தேசிய வானிலை மையம் எச்சரித்துள்ளது.