திருகோணமலை கடற்பரப்பில் மீட்கப்பட்ட ஆளில்லா விமானம் வெளிநாட்டில் தயாரிக்கப்பட்டது – விமானப்படை பேச்சாளர் வெளிநாட்டில் தயாரிக்கப்பட்ட ஆளில்லா விமானமே திருகோணமலை கடற்பரப்பில் மீட்கப்பட்டுள்ளதாக இலங்கை விமானப்படை தெரிவித்துள்ளது.

விமான எதிர்ப்பு பயிற்சிகளிற்கு பயன்படுத்தப்படும் ஆளில்லா விமானமே மீட்கப்பட்டுள்ளதாக விமானப்படை பேச்சாளர் எரன்டகீகனகே தெரிவித்துள்ளார்.

இந்த ஆளில்லா விமானம் உள்நாட்டில் தயாரிக்கப்பட்டது இல்லை என்பது ஆரம்பகட்ட விசாரணைகளின் போது தெரியவந்துள்ளதாக அவர் குறிப்பிட்டுள்ளார்.

இந்த ஆளில்லா விமானம் இலங்கையின் முப்படைகளிற்கு சொந்தமானதில்லை என  குறிப்பிட்டுள்ள அவர் இந்த ஆளில்லா விமானம் பயிற்சியின் போது தவறுதலாக  இலங்கையின் கடற்பரப்பில் தரையிறங்கியிருக்கலாம் என  குறிப்பிட்டுள்ளார்.

இந்த ஆளில்லா விமானத்தில் வெடிபொருட்கள் இருக்கவில்லை,இதனால் இலங்கைக்கு எந்த பாதிப்பும் இல்லை எனவும் அவர் தெரிவித்துள்ளார்.

விசாரணைகள் இடம்பெறுகின்றன 2022 இல் இவ்வாறான ஆளில்லா விமானமொன்று ஓடிசாவிலிருந்து இலங்கைக்கு வந்திருந்தது எனவும் அவர் தெரிவித்துள்ளார்.