தனியாக வசிக்கும் பெண்களுக்கு சென்னையில் வீடு கிடைப்பது சவாலாக இருப்பது ஏன்?

தனியாக வசிக்கும் பெண்களுக்கு சென்னையில் வீடு கிடைப்பது சவாலாக இருப்பது ஏன்?

தனியாக வாழ்ந்து வரும் பெண்களும், கணவரிடம் இருந்து பிரிந்து வாழும் பெண்களும் சென்னை போன்ற பெருநகரங்களில் வாடகைக்கு வீடு தேடுவது அத்தனை எளிதாக இருப்பதில்லை.

வளர்ந்து வரும் தொழில்நுட்பத்துறை வேலை வாய்ப்புகள், கல்வி போன்ற அம்சங்கள் பல்வேறு நகரங்கள் மற்றும் கிராமங்களில் இருந்து பெண்களை சென்னைக்கு வர செய்கிறது.

நிதிசார் சுதந்திரம் மற்றும் ப்ரைவசி போன்ற காரணங்கள் கருதி பல இளம் பெண்கள் சென்னையில் விடுதிகளுக்கு பதிலாக வீடுகளை வாடகைக்கு எடுத்து தங்கும் போக்கும் சமீபத்திய காலங்களில் அதிகரித்து வருகிறது.

ஆனால் அவ்வாறு வீடு தேடி, அதை கண்டடைந்து அங்கே தங்குவது என்பது எளிதான காரியம் அல்ல. திருமணமாகாத இளம் பெண்கள் மட்டுமின்றி, பல்வேறு காரணங்களுக்காக திருமண உறவில் இருந்து வெளியேறும் பெண்களும் பெருநகரங்களில் வீடு தேடுவதில் பல்வேறு இன்னல்களை சந்திக்கின்றனர்.

அவர்களின் ஆடை சுதந்திரம், வேலை பார்க்கும் நேரம், வீட்டுக்கு திரும்பும் நேரம், அவர்களுடன் பழகும் நபர்கள் என்று பல்வேறு சோதனைகளுக்கு பிறகே வீடுகளை தர முன்வருகின்றனர் சில வீட்டு உரிமையாளர்கள்.

தங்கள் வீட்டில் வாடகைக்கு வரும் பெண்களின் பாதுகாப்பு, வீட்டிற்கான நற்பெயர் போன்றவற்றை கருத்தில் கொண்டுதான் இத்தகைய கேள்விகள் கேட்கப்படுகிறது என்று கூறுகின்றனர் வீட்டின் உரிமையாளர்கள்.

‘கணவரை பிரிந்து வாழும் பெண்களுக்கு ஆதரவு இல்லை’

“ஒரு மோசமான திருமண உறவில் இருந்து நான் வெளியேறினேன். பதின்ம வயதை நெருங்கும் மகனோடு நான் வீட்டில் இருந்து வெளியேறிய போது எனக்கு வேலை என ஒன்றும் இல்லை. முதலில் வீடு தேட வேண்டிய கட்டாயம் ஏற்பட்டது. பிறகு வேலை. எங்கெல்லாம் நான் வீடு தேடச் செல்கின்றேனோ, அங்கெல்லாம் கணவர் பற்றியே அதிக கேள்விகள் வந்தது,” என்று கூறுகிறார் 36 வயதான அனு (பெயர் மாற்றப்பட்டுள்ளது).

அனு மதுரையை பூர்வீகமாக கொண்டவர். சென்னையில் 2022-ஆம் ஆண்டு கிட்டத்தட்ட 30க்கும் மேற்பட்ட வீடுகளை பார்த்ததாக பிபிசி தமிழிடம் தெரிவிக்கிறார்.

“ஆரம்பத்தில் நான் என்னுடைய கணவனோடு இல்லை என்று கூறிய போது, பிரச்னை என்று வந்தால் வீட்டிற்கு வந்து சண்டை போடுவாரா? மகனை பார்க்க வந்தால் எத்தனை நாட்கள் தங்குவார்? உங்களைப் பார்க்க ஆண் நண்பர்கள் வருவார்களா? என்று கேட்டார்கள்,” என்று கூறுகிறார் அனு.

“தற்போது ஒரு வீட்டில் வசித்து வருகிறேன். என் கணவர் வெளிநாட்டில் பணி புரிகிறார் என்று பொய் கூறி நான் இங்கே வந்து வாழும் சூழல் ஏற்பட்டது. ஏற்கனவே குடும்ப வன்முறைக்கு ஆளாகி வெளியே வரும் என்னைப் போன்ற பெண்களுக்கு இந்த சமூகம் ஆதரவாக இல்லை. அதனால் தான் பொய் கூற வேண்டிய நிலை ஏற்பட்டது,” என்கிறார் அவர்.

“சென்னையைப் பொறுத்தமட்டில் கணவரை இழந்த பெண்களுக்கு இருக்கும் ஆதரவு கணவரை பிரிந்து வாழும் பெண்களுக்கு கிடைப்பதில்லை” என்று கூறுகிறார் சென்னையில் வீடு வாடகை, விற்பனை போன்றவற்றில் ஈடுபட்டு வரும் நிறுவனம் ஒன்றில் இடைத்தரகராக பணியாற்றும் கௌதமி பிஸ்வாஸ்.

”மக்கள் தனி நபர்களின் சுதந்திரத்திற்கு மதிப்பளிப்பதில்லை. அதனால் தான் பெண்களின் தனிப்பட்ட முடிவுகளிலும் வாழ்விலும் பலரும் தலையிடும் சூழல் ஏற்படுகிறது” என்கிறார் கௌதமி.

இளம் பெண்கள் எதிர்கொள்ளும் சவால்கள் என்ன?

“படிப்பிற்காக சென்னைக்கு நாங்கள் வரும் போது எங்களுக்கு இருக்கும் ஒரே ஒரு வழி விடுதிதான். குளிக்க, கழிவறையை பயன்படுத்த நீண்ட வரிசையில் நிற்க வேண்டும். விடுதிகளில் ‘ப்ரைவசி’ என்பதற்கு இடமே இல்லை. அதனால் வேலை கிடைத்த போது, ஒரு வீட்டில், ஒரு சிறிய அறையில் வாழலாம் என்ற முடிவை எடுத்தேன்,” என்கிறார் ஆதிரை.

திருச்சியை பூர்வீகமாக கொண்ட ஆதிரை மனநல ஆலோசகராக பணியாற்றி வருகிறார்.

“வீட்டு உரிமையாளர்கள் கேட்கும் முதல் கேள்வியே ஆண் நண்பர்கள் யாரேனும் வீட்டுக்கு வருவார்களா என்பதுதான். ஒரு 20 வயதை தாண்டிய பெண்ணுக்கு அனைத்து தரப்பிலும் நண்பர்கள் இருப்பார்கள். அவர்களுக்கு ‘சோஷியல் லைஃப்’ என்ற ஒன்று இருக்கிறது என்பதையே ஏற்றுக் கொள்ள மறுக்கின்றனர்,” என்கிறார் ஆதிரை.

“ஒரு மகிழ்ச்சியான மாலையில் உணவை பகிர்ந்து கொண்டு நண்பர்களுடன் என்னுடைய வீட்டில் ஒரு படம் பார்ப்பது எனக்கு பிடித்த ஒன்றாக இருக்கும். ஆனால், தனியாக வாழும் பெண்ணுக்கு எந்தவிதமான ஆசைகளும் இருக்கக் கூடாது என்றுதான் எதிர்பார்க்கின்றனர்,” என்று கூறுகிறார் அவர்.

“தனியாக வசிக்கும் ஒரு பெண்ணின் வீட்டிற்கு ஒரு ஆண் அல்லது ஆண் நண்பர்கள் வந்தாலே அவர்களின் ஒழுக்கம் கேள்விக்குள்ளாக்கப்படுகிறது. குடும்பங்களாக இங்கே வந்து வாழ்பவர்கள் இத்தனை கேள்வியை எதிர்கொள்வதில்லை.”

ஜூன் மாதம் துவங்கி அக்டோபர் வரை கிட்டத்தட்ட 10 வீடுகளை நேரில் சென்று பார்த்ததாக கூறும் ஆதிரை, ” சில வீட்டு தரகர்களும் சரி, ஒரு பெண் தனியாக இருக்கிறார் அவரின் பாதுகாப்பை உறுதி செய்யும் வகையிலான வீடுகளை காட்ட வேண்டும் என்று காட்டுவதில்லை,” என்கிறார் அவர்.

அதிக வாடகை தரும் பெண்கள்

தனியார் ஐ.டி. நிறுவனத்தில் பணியாற்றி வருபவர் பவ்யா வரதராஜன். கடந்த நான்கு ஆண்டுகளாக சென்னை பெருங்குடி பகுதியில் வசித்து வருகிறார்.

“காரணமே இல்லாமல் வீட்டை காலி செய்யுங்கள் என்று வீட்டின் உரிமையாளர்கள் கூறுவதை பல பெண்கள் தொடர்ச்சியாக சந்தித்து வருகின்றனர்,” என்கிறார் பவ்யா.

“பெருங்குடியில் உள்ள அடுக்குமாடி குடியிருப்பு ஒன்றில் இரண்டு வருடங்களுக்கு முன்பு வசித்து வந்தேன். அந்த ஃபாள்ட்டில் என்னுடன் தங்கியிருந்த பெண்ணுக்கு வேலை மாற்றலாகி அவர் வேறொரு நகரத்துக்கு செல்ல நேரிட்டது. அந்த வீட்டின் உரிமையாளர் எனக்கு போன் செய்து நான் வீட்டு வாடகையை 10% உயர்த்தப் போகிறேன். நீங்களும் வேறு வீடு பார்த்துக் கொள்ளுங்கள் கூறி வீட்டை காலி செய்ய கூறிவிட்டார்,” என்று நினைவு கூர்ந்தார் பவ்யா.

“வீடு தேடுவது சவாலானதாக இருக்கிறது. இரண்டாவது, தனி நபராக பொருட்களை எல்லாம் ஓரிடத்தில் இருந்து மற்றொரு இடத்திற்கு மாற்றுவது பெரும் தலைவலி. பிறகு அலுவலகத்திற்கு அருகிலேயே வீடு கிடைப்பதும் சவாலானது என்பதால் மறுப்பு தெரிவிக்காமல் நாங்கள் அவர்கள் கேட்கும் பணத்தை தருகிறோம்,” என்று கூறுகிறார் பவ்யா.

மற்ற தென்னிந்திய நகரங்களில், பெங்களூருவில் தனியாக வசிக்கும் பெண்களுக்கு ஓரளவு சவால்கள் ஏதும் இல்லாமல் வீடுகள் கிடைக்கின்றன.

பிபிசி தமிழிடம் பேசிய அக்‌ஷயா ராஜ்குமார், பெங்களூருவில் தனியார் நிறுவனம் ஒன்றில் பணியாற்றி வருகிறார். “இதுவரை நான் வீடுகள் பார்த்த போது எந்த சவால்களையும் சந்திக்கவில்லை. மேலும் இங்கே தனியாக இருக்கும் பெண்களுக்கு வீடுகளை வாடகைக்கு விடுவது பெண்களாகதான் இருக்கின்றனர்,” என்று கூறுகிறார்.

சில ஆண்டுகளுக்கு முன்பு ஆந்திராவின் விசாகப்பட்டினத்தில் பணியாற்றிய பவானிக்கு வீடுகள் கிடைப்பதில் சவால்கள் இருந்ததை தெரிவிக்கிறார்.

“பெற்றோர்கள் உட்பட யாரும் வீட்டுக்கு வரக் கூடாது என்ற தடை ஒரு வீட்டில் இருந்தது. மற்றொரு வீட்டில், ஆண் நண்பர்கள் வருகைக்கு மறுப்பு தெரிவிக்கப்பட்டிருந்தது. வீட்டிற்கு யார் யார் வருகிறார்கள் என்பதை நோட்டமிடும் வகையில் பாதுகாவலர் நியமிக்கப்பட்டிருந்தார்,” என்று கூறுகிறார் பவானி.

டெல்லி மற்றும் பஞ்சாபின் முக்கிய நகரங்களில் பெண்கள் இத்தனை சவால்களை எதிர்கொள்வதில்லை என்று கூறுகின்றனர் அங்கே வசிக்கும் பெண்கள்.

மறுக்கப்படும் வீடுகள்

தனியாக வாழும் பெண்களுக்கும், கணவரை பிரிந்து வாழும் பெண்களுக்கும் முன்னுரிமை கொடுத்து வீடுகளை தேடித் தருவதாக கூறும் கௌதமி பிஸ்வாஸ், எந்தெந்த காரணங்களை முன்வைத்து வீடுகள் மறுக்கப்படுகிறது என்பதை பட்டியலிட்டார்.

“உங்களின் மதம், உங்களின் உணவு, நீங்கள் உடுத்தும் ஆடை என அனைத்தும் இதில் முக்கிய பங்காற்றுகிறது. உயர்சாதியினர் வசிக்கும் சில பகுதிகளில், அசைவ உணவு சாப்பிடும் பெண்களுக்கு வீடுகள் மறுக்கப்படுகிறது,” என்று தெரிவித்தார்.

“ஐ.டி. துறையில் பெண்கள் வேலைக்கு செல்வதால் அவர்களின் பணி நேரம் தொடர்ச்சியாக மாறிக் கொண்டிருக்கும். இரவு 11 மணிக்கு மேல் பெண்கள் அவர்களின் வசிப்பிடத்திற்கு திரும்புவார்கள் என்று கூறினால் அவர்களுக்கு வீடு மறுக்கப்பட்டு விடுகிறது” என்கிறார் அவர்.

“சென்னையில் இரண்டாவது முறையாக வீடு தேட ஆரம்பித்தேன். தனியார் நிறுவனத்தின் இணைய வழியாக வீடு ஒன்றை கண்டுபிடித்து வீட்டின் உரிமையாளர்களுக்கு போன் செய்த போது, அவர்கள் என்னிடம் கேட்ட முதல் கேள்வி, ‘நீங்க என்ன ஆளுங்க,’ என்பதுதான். நீண்ட மௌனத்திற்கு பிறகு, நீங்கள் ‘நான்-பிராமிணா?’ என்றார்கள். ஆம் என்றவுடன் வேறேதும் கேட்காமல் அவர்கள் வீடில்லை என்று கூறிவிட்டனர்” என்கிறார் ஆதிரை.

இதில் ஏற்படும் சிக்கல்களை அறிந்து கொள்ள பிபிசி தமிழ் முயற்சி செய்த போது, தனியாக வசிக்கும் பெண்களுக்கு சென்னையில் இரண்டு படுக்கைகளைக் கொண்ட வீடுகளின் வாடகை ரூ.20 ஆயிரத்தில் இருந்துதான் ஆரம்பமாகிறது என்று தெரியவந்தது.

ரூ. 20 ஆயிரம் வாடகைக்கு காட்டப்பட்ட வீடுகளில் பெரும்பாலான வீடுகள் சுற்றுச்சுவர்கள் ஏதுமின்றி, சி.சி.டி.வி. கேமராக்கள் ஏதுமற்ற, மழைக்கு வெள்ளம் சூழும் பகுதிகளிலே இருந்தது. பாதுகாப்பான சூழல் என்பதை கருத்தில் கொண்டால் ரூ. 30 ஆயிரத்திற்கு தான் வீடுகள் கிடைக்கின்றன.

“இந்த நகரத்தில் ஐ.டி. பணியாளர்கள் அதிகம் என்பதால் அவர்களை மையப்படுத்தியே இங்கு வீட்டின் வாடகை நிர்ணயிக்கப்படுவதாக நான் உணருகிறேன்,” என்கிறார் ஆதிரை.

“என்னுடைய முதல் வேலையில் என்னுடைய சம்பளம் ரூ.17 ஆயிரம் மட்டுமே. நானும் என் மகனும் தங்க, ஒரு படுக்கையறையை கொண்ட வீட்டின் வாடகை மட்டும் ரூ. 13 ஆயிரம். பராமரிப்புக்கு ஆகும் செலவு ஆயிரத்தை தாண்டும். ஆனால் சி.சி.டி.வி, பாதுகாவலர்கள், முறையாக பராமரிக்கப்பட்ட இடத்திற்கு நான் முன்னுரிமை அளித்தேன். அதற்காக நிறைய செலவும் செய்ய நேரிட்டது,” என்கிறார் அனு.

கல்வி, திருமணத்தை திட்டமிடுதல், வேலைக்கு செல்லும் பெண்களின் எண்ணிக்கை உயர்வு போன்றவை காரணமாக தனியாக வாழும் பெண்களின் எண்ணிக்கை அதிகரித்து வருகிறது. 2025-ஆம் ஆண்டுக்குள் இந்தியாவில் தனியாக வாழும் பெண்களின் எண்ணிக்கையானது 100 மில்லியனை (10 கோடி) எட்டும் என்று தேசிய குடும்ப நல கணக்கெடுப்பு தெரிவிக்கிறது

“பெண்களுக்கு வீடு என்பது எதைப் பற்றியும் கவலை ஏதுமின்றி நிம்மதியாக இருக்க தேவைப்படும் ஒன்று. பாதுகாப்பாகவும், எப்போதும் எச்சரிக்கை உணர்வுடன் இல்லாமல் இருக்க வேண்டும். அது போன்ற உணர்வு சென்னை போன்ற நகரங்களில் வசிக்கும் பெண்களுக்கும் தேவை,” என்கிறார் பெண்ணிய செயற்பாட்டாளரும் எழுத்தாளருமான கவிப்ரியா மூர்த்தி.

“கல்வி, தொழில்நுட்பம், வர்த்தகம் போன்ற அம்சங்களின் மையமாக சென்னை திகழ்கிறது. இருந்தாலும் கூட பெண்களின் சுதந்திரம் என்று வரும் போது சென்னை மேம்பட்டதாக தெரிகிறதா என்பது கேள்விக்குறிதான்” என்றார் அவர்.

ஐ.டி.துறையில் பெண்களின் பங்களிப்பு

அவர்களால் ஒரு வசதியான அல்லது அதிக வசதிகளைக் கொண்ட விடுதிகளில் தங்க முடியும் என்கிறார் தமிழ்நாடு விடுதிகள் மற்றும் பி.ஜி. உரிமையாளர்கள் நல சங்கத்தின் பொருளாளர் ஜி.கார்த்திக்.

“சென்னையில் மட்டும் சிறிதும் பெரிதுமாக 10 ஆயிரம் பெண்கள் விடுதிகள் செயல்பட்டு வருகிறது. விடுதிகள் அமைந்திருக்கும் இடம் மற்றும் அதில் வழங்கப்படும் வசதிகளைப் பொறுத்து அதன் வாடகை இருக்கும். ஓ.எம்.ஆர். சாலையில் ஒருவரால் ரூ. 6 ஆயிரத்திற்கு விடுதியில் தங்க இயலும். அண்ணா நகரில் விடுதி கட்டணம் ரூ.9 ஆயிரத்தில் ஆரம்பிக்கும். அதுவே நுங்கம்பாக்கம் என்றால் ஆரம்பகட்ட கட்டணமே ரூ.10 ஆயிரத்தில்தான் துவங்கும்,” என்கிறார் கார்த்திக்.

இதன் பின்னால் இருக்கும் சமூக உளவியல்

மூத்த பத்திரிக்கையாளரும், எழுத்தாளருமான சமீரா கான் இந்த சமூக மனநிலைக்கு பின்னால் இருக்கும் உளவியல் குறித்து பிபிசியிடம் கூறினார்.

மும்பையில் உள்ள பொது இடங்களை பெண்கள் அணுகுவதில் உள்ள பிரச்னைகளை ஆராயும் வொய் லாய்ட்டர் (Why Loiter) என்ற புத்தகத்தின் இணை ஆசிரியரான சமீரா கான், “இந்த பிரச்னையை சென்னையில் வசிக்கும் பெண்கள் மட்டுமே சந்திக்கின்றனர் என்று கூறிவிட இயலாது. இந்தியாவின் மும்பை போன்ற பெருநகரங்களிலும் இத்தகைய சவால்கள் இருக்கின்றன,” என்றார்.

“குடித்தாலோ, அவருடைய வீட்டில் அவர் ‘பார்ட்டி’ நடத்தினாலோ, ஆண் நண்பர்கள் வந்தாலோ, வீட்டிற்கு தாமதமாக வந்தாலோ அவரை மோசமான பெண்ணாக இந்த சமூகம் பார்க்கிறது”

“இந்தியாவைப் பொறுத்தவரை குடும்ப அமைப்பில் வாழும் பெண்கள் மட்டுமே மதிப்பிற்குரியவர்களாக கருதும் போக்கு நிலவி வருகிறது. அதனால்தான் அந்த குடும்ப அமைப்பில் நிலவும் வன்முறைகள், பெண்களை மோசமாக நடத்தும் போக்குகளை இந்த சமூகம் கண்டும் காணாமல் விட்டுவிடுகிறது,” என்று கூறினார் சமீரா கான்.

– இது, பிபிசிக்காக கலெக்டிவ் நியூஸ்ரூம் வெளியீடு.