ரவிச்சந்திரன் அஸ்வின் சர்வதேச கிரிக்கெட்டில் இருந்து ஓய்வு – என்ன கூறினார்?

ரவிச்சந்திரன் அஸ்வின் சர்வதேச கிரிக்கெட்டில் இருந்து ஓய்வு – என்ன கூறினார்?

இந்திய கிரிக்கெட் அணியின் சுழற்பந்து வீச்சாளர் ரவிச்சந்திரன் அஸ்வின் சர்வதேச கிரிக்கெட் போட்டிகளில் இருந்து ஓய்வு பெறுவதாக அறிவித்துள்ளார்.

இந்திய கிரிக்கெட் அணியின் அதிகாரப்பூர்வ இன்ஸ்டாகிராம் பக்கத்தில், தமிழ்நாட்டைச் சேர்ந்த அஸ்வினின் சாதனைகளுக்காக வாழ்த்து தெரிவிக்கப்பட்டுள்ளது.

மேலும், அஸ்வினின் சாதனைகளுக்காக பிசிசிஐ நன்றி தெரிவித்துள்ளது.

இந்தியா-ஆஸ்திரேலியா அணிகளுக்கு இடையே, ஆஸ்திரேலியாவின் பிரிஸ்பேன் நகரில் புதன்கிழமை (டிச. 18) நடைபெற்ற டெஸ்ட் போட்டி டிராவில் முடிவடைந்ததைத் தொடர்ந்து, அஸ்வின் இந்த முடிவை அறிவித்தார்.

இதுவரை, 38 வயதான அஸ்வின் 106 போட்டிகளில் விளையாடியுள்ளார், 537 விக்கெட்டுகளை எடுத்துள்ளார்.

அவர், 8 முறை ஒரே போட்டியில் 10 விக்கெட்டுகளை எடுத்துள்ளார். சிறப்பாக பேட்டிங் செய்பவராகவும் அஸ்வின் விளங்கினார். ஆறு முறை சதம் அடித்துள்ள அஸ்வின், 14 முறை அரை சதம் அடித்துள்ளார்.

“அனைத்து வகையான சர்வதேச கிரிக்கெட் போட்டிகளிலும் இதுதான் எனது கடைசி நாள். ஒரு கிரிக்கெட்டராக எனக்குள் இன்னும் திறமை இருப்பதாகவே உணர்கிறேன். ஆனாலும், க்ளப் அளவிலான கிரிக்கெட்டில் அதைக் காட்ட விரும்புகிறேன். சர்வதேச கிரிக்கெட்டில் இன்றுதான் எனது கடைசி நாள்,” காபா டெஸ்டை தொடர்ந்து செய்தியாளர்களிடம் அஸ்வின் தெரிவித்தார்.

அப்போது, “ரோஹித், விராட், ரஹானே எனப் பல கிரிக்கெட்டர்களுக்கு நன்றி கூற வேண்டியுள்ளது. நன்றி சொல்வதற்கு நிறைய பேர் உள்ளனர். நிறைய நினைவுகளைச் சேகரித்துள்ளேன். இது மிகவும் உணர்ச்சி மிகுந்த தருணம்,” என்றும் கூறினார்.

இன்றைய போட்டிக்கு முன்னதாக, விராட் கோலி – அஸ்வின் இருவரும் அமர்ந்து பேசும் வீடியோ சமூக ஊடகங்களில் வைரலானது.

அந்தக் காணொளியில், விராட் கோலி, அஸ்வினை ஆரத் தழுவுகிறார். அப்போது, அஸ்வின் ‘உணர்ச்சிவசப்பட்டு’ இருந்ததாக நெட்டிசன்கள் பலரும் தெரிவித்து வந்தனர்.

இதைத் தொடர்ந்து, அஸ்வின் சர்வதேச போட்டிகளில் இருந்து ஓய்வை அறிவிக்கலாம் என்ற யூகங்களும் கிளம்பிய நிலையில் இந்த அறிவிப்பு வந்துள்ளது.

விராட் கோலி என்ன கூறினார்?

அஸ்வினின் ஓய்வு அறிவிப்பு குறித்து தனது எக்ஸ் பக்கத்தில் விராட் கோலி பதிவிட்டுள்ளார்.

அதி, அஸ்வினுடன் “நான் 14 ஆண்டுகள் விளையாடியுள்ளேன்” எனக் குறிப்பிட்டுள்ள கோலி, “இன்று நீங்கள் ஓய்வு பெறுகிறீர்கள் எனச் சொன்னபோது, அது என்னை உணர்ச்சிவயப்படுத்தியது. நாம் ஒன்றாக விளையாடிய நாட்கள் என் கண்முன் வந்தன. உங்களுடனான இந்தப் பயணத்தின் ஒவ்வொரு பகுதியையும் நான் ரசித்தேன்.

இந்திய கிரிக்கெட்டில் உங்களின் திறமையும் வெற்றிகளில் உங்கள் பங்களிப்பிலும் நீங்கள் எப்போதும் இந்திய கிரிக்கெட்டின் ஜாம்பவானாக நினைவில் கொள்ளப்படுவீர்கள்.

உங்களுக்கும் உங்களுக்கு நெருக்கமானவர்களுக்கும் மிகுந்த மரியாதையுடனும் அன்புடனும், எல்லாவற்றுக்கும் நன்றி கூறிக் கொள்கிறேன்,” என்று தெரிவித்துள்ளார்.

‘GOAT’ ஓய்வு பெற்றதாக அறிவித்த தினேஷ் கார்த்திக்

“எவ்வளவு சிறப்புவாய்ந்த விளையாட்டு வாழ்க்கை. உங்களுடன் விளையாடியதில் பெருமை கொள்கிறேன். தமிழ்நாட்டில் இருந்து இந்திய அணிக்காக விளையாடியவர்களில் நிச்சயமாக நீங்கள்தான் மிகச் சிறந்த வீரர்,” என்று தினேஷ் கார்த்திக் அஸ்வினுக்கு புகழாரம் சூடியுள்ளார்.

முன்னாள் கிரிக்கெட் வீரர் ஹர்பஜன் சிங், “டெஸ்ட் கிரிக்கெட் மீதான உங்களின் காதல் போற்றத்தக்கது. இந்தியாவின் சுழற்பந்துவீச்சின் அடையாளமாக பத்து ஆண்டுகளுக்கும் மேலாகத் திகழ்ந்து சிறப்பாகச் செயலாற்றினீர்கள். உங்கள் சாதனைகளை நினைத்துப் பெருமை கொள்ளுங்கள்,” என்று தெரிவித்துள்ளார்.

கௌதம் கம்பீர் நெகிழ்ச்சி

இளம் பந்துவீச்சாளராக இருந்து நவீன கிரிக்கெட்டின் ஜாம்பவனாக அஸ்வின் வளர்வதைப் பார்த்துள்ளதாகக் குறிப்பிட்ட கௌதம் கம்பீர், “அது தனது வாழ்வில் முக்கியமான ஓர் அங்கம் என்றும், இனி வரும் தலைமுறைகளில் பலரும் அஸ்வினை பார்த்து பந்துவீச்சாளர் ஆனதாகக் கூறுவார்கள் என்று எனக்குத் தெரியும் எனவும்” தெரிவித்துள்ளார்.

யூசுஃப் பதான், “திறமை, லட்சியம், கிரிக்கெட் குறித்த நுண்ணறிவு என ஒரு ஜாம்பவனாக விளங்குகிறார் அஸ்வின்” என்று குறிப்பிட்டுள்ளார். மேலும், “அளவற்ற நினைவுகளைக் கொடுத்தமைக்கும் கிரிக்கெட்டில் உங்கள் பங்களிப்புக்கும் நன்றி” என்று அவர் பதிவிட்டுள்ளார்.

– இது, பிபிசிக்காக கலெக்டிவ் நியூஸ்ரூம் வெளியீடு.