காங்கிரஸ் கட்சியின் மூத்த தலைவரும், ஈரோடு கிழக்கு தொகுதி சட்டமன்ற உறுப்பினருமான ஈவிகேஎஸ் இளங்கோவன் உடல்நலக் குறைவால் இன்று (14) காலை காலமானார்.
உடல்நல குறைவு காரணமாக மருத்துவமனையில் அனுமதிக்கப்பட்ட நிலையில் இன்று காலை 10.12 அளவில் காலமானதாகத் தெரிவிக்கப்படுகின்றது.
மறைந்த ஈவிகேஎஸ் இளங்கோவன் உடல், நாளை (15) இராமாபுரத்தில் தகனம் செய்யப்பட உள்ளதாக அவரது குடும்பத்தினர் தெரிவித்துள்ளனர்.
அவரது மறைவை அடுத்து சத்தியமூர்த்தி பவனில் அரைக்கம்பத்தில் கட்சிக் கொடி பறக்க விடப்பட்டுள்ளது. இதேவேளை அவரது மறைவுக்குப் பலரும் இரங்கல் தெரிவித்து வருகின்றனர்.
மறைந்த ஈவிகேஎஸ் இளங்கோவன் உடல் பொதுமக்களின் அஞ்சலிக்காக சென்னை நந்தம்பாக்கம் அருகில், அவர் வாழ்ந்த மணப்பாக்கம் வீட்டுக்கு கொண்டு செல்லப்பட்டது.
இதைத்தொடர்ந்து, அங்கு சென்ற தமிழக முதல்வர் மு.க.ஸ்டாலின், ஈவிகேஎஸ் இளங்கோவன் உடலுக்கு மலர்மாலை வைத்து வைத்து அஞ்சலி செலுத்தினார். அவரது குடும்பத்தினரைச் சந்தித்து ஆறுதல் தெரிவித்தார்.
முதல்வர் ஸ்டாலின் உடன் துணை முதல்வர் உதயநிதி, அமைச்சர்கள் துரைமுருகன், தா.மோ.அன்பரசன், மா.சுப்பிரமணியன், சேகர்பாபு, கோ.வி.செழியன் ஆகியோர் அஞ்சலி செலுத்தினர்.
மேலும், மதிமுக பொதுச் செயலாளர் வைகோ, தமிழ்நாடு காங்கிரஸ் கமிட்டியின் தலைவர் செல்வப்பெருந்தகை, தமிழக எம்.பி.க்கள் மற்றும் எம்எல்ஏ-க்கள் மற்றும் காங்கிரஸ் கட்சியின் நிர்வாகிகளும் அஞ்சலி செலுத்தினர்.
