இலங்கை முழுவதும் விசேட பாதுகாப்பு ஏற்பாடு !

இலங்கை முழுவதும் விசேட பாதுகாப்பு ஏற்பாடு ! on Saturday, November 09, 2024

இலங்கையில் தேர்தல் கடமைகளுக்காக 63,145 பொலிஸ் உத்தியோகத்தர்கள் நேரடியாக ஈடுபடுத்தப்படவுள்ளதாக பொலிஸ் ஊடகப் பேச்சாளர் பிரதி பொலிஸ் மா அதிபர் நிஹால் தல்துவ தெரிவித்துள்ளார்.

நேற்று பிற்பகல் இடம்பெற்ற ஊடகவியலாளர் சந்திப்பில் கலந்து கொண்ட பொலிஸ் ஊடகப் பேச்சாளர் இதனைத் தெரிவித்துள்ளார்.

மேலும், 3,200 பொலிஸ் விசேட அதிரடிப்படையினர் தேர்தல் கடமைகளுக்காக ஈடுபடுத்தப்படவுள்ளதாக அவர் தெரிவித்துள்ளார்.

இதேவேளை, குறிப்பிட்ட இடங்களில் பாதுகாப்பிற்காக நியமிக்கப்பட்டுள்ள பொலிஸ் உத்தியோகத்தர்கள் தேர்தல் கடமைகளுக்காக அவ்விடங்களில் இருந்து விலக்கிக் கொள்ளப்பட வேண்டுமெனவும் பொலிஸ் ஊடகப் பேச்சாளர் குறிப்பிட்டுள்ளார்.

அதன்படி, அந்த இடங்களின் பாதுகாப்புக்கு ராணுவ வீரர்களை ஈடுபடுத்த வேண்டியிருக்கும் என அவர் செய்தியாளர் சந்திப்பில் தெரிவித்தார்.

வாக்களிப்பு நிறைவடைந்ததன் பின்னர் நாடளாவிய ரீதியில் 269 வீதித்தடைகளும் 3,109 நடமாடும் சுற்றுப்பயணங்களும் மேற்கொள்ள திட்டமிடப்பட்டுள்ளதாக பொலிஸார் மேலும் தெரிவித்தனர்.

இது தவிர, 241 கலவர எதிர்ப்பு குழுக்கள் தீவு முழுவதும் செயல்பட திட்டமிடப்பட்டுள்ளது, மேலும் பாதுகாப்புக்காக புலனாய்வு அதிகாரிகளும் ஈடுபடுத்தப்பட உள்ளதாக பொலிஸ் ஊடகப் பேச்சாளர் இங்கு தெரிவித்தார்.