“பிரதான அரசியல்கட்சிகளுக்கு, ஐக்கிய ஜனநாயகக்குரல் கட்சியானது பெரும் சவாலாக மாறியுள்ளதாக அக்கட்சியின் ஊடகப்பேச்சாளர் ரவி குமுதேஷ் தெரிவித்துள்ளார்.
ஐக்கிய ஜனநாயக்குரல் கட்சியின் தலைவர் ரஞ்சன் ராமநாயக்க தலைமையில் இன்று இடம்பெற்ற ஊடக சந்திப்பிலேயே அவர் இவ்வாறு தெரிவித்துள்ளார்.
இது குறித்து அவர் மேலும் தெரிவித்துள்ளதாவது” பிரதான அரசியல்கட்சிகளுக்கு நாம் சவாலாக மாறியுள்ளோம் என்ற விடயத்தினை நாங்கள் தெரிந்து கொண்டோம். ஐக்கிய ஜனநாயகக்குரல் கட்சியின் மாநாடு அண்மையில் இடம்பெற்ற நிலையில் மாநாடு தொடர்பாக சேறுபூசும் நடவடிக்கைகள் முன்னெடுக்கப்பட்டுவருகின்றன.
பிரபல அரசியல்கட்சிகளை சேர்ந்த இருவரினால் அவ்வாறான நடவடிக்கைகள் முன்னெடுக்கப்பட்டிருந்தன. அதாவது ரஞ்சன்ராமநாயக்க பல்கலைக்கழக மாணவர்களுக்கு பணம் கொடுத்து மாநாட்டிற்கு வரவழைத்திருந்ததாக ஊடகங்களில் தகவல்வெளியானது.
பல்கலைக்கழக மாணவர்களை விலைகொடுத்து வாங்கும் அளவில் மோசமாக செயற்படுபவர்கள் நாம் அல்ல. எனவே இது அரசியல்லாபம் கருதி பிரிதொருதரப்பினரால் திட்டமிட்டமுறையில் மேற்கொள்ளப்பட்ட ஒன்றாகும்” இவ்வாறு ரவிகுமுதேஷ் தெரிவித்துள்ளார்.