பிரிக்ஸ் மாநாடு- யுக்ரேன் போர் குறித்து புதினிடம் மோதி என்ன சொன்னார்?- இரானுடன் பேசியது என்ன?

பிரிக்ஸ் மாநாடு- யுக்ரேன் போர் குறித்து புதினிடம் மோதி என்ன சொன்னார்?- இரானுடன் பேசியது என்ன?

40 நிமிடங்களுக்கு முன்னர்

இந்தியா சீனா இடையிலான மெய்யான கட்டுப்பாட்டுக் கோடு பகுதியில் பிரச்னைகளை சற்று தணிக்கும் வகையில், இரு நாடுகளுக்கும் இடையில் உடன்படிக்கை ஏற்பட்டுள்ளது. இந்நிலையில், இரு நாட்டின் தலைவர்களும் ரஷ்யாவில் இரு தரப்பு பேச்சுவார்த்தையை புதன்கிழமை நடத்துகின்றனர்

இதனை இந்திய வெளியுறவுத்துறை செயலாளர் விக்ரம் மிஸ்ரி உறுதி செய்துள்ளார். சுமார் 5 ஆண்டுகளுக்குப் பிறகு இரு தலைவர்களுக்கும் இடையே இருதரப்பு பேச்சுவார்த்தை நடைபெற உள்ளது.

2020-ஆம் ஆண்டில் எழுந்த பிரச்னைகளைத் தீர்ப்பதற்கும் பதட்டங்களைக் குறைப்பதற்கும் இரு நாடுகளுக்கும் இடையில் ஒரு உடன்படிக்கை எட்டப்பட்டதாக திங்களன்று வெளியுறவுச் செயலாளர் ஒரு செய்தியாளர் கூட்டத்தில் அறிவித்திருந்தார்.

எல்லை ரோந்து தொடர்பாக இந்தியாவுக்கும் சீனாவுக்கும் இடையிலான உடன்படிக்கை குறித்து, மிஸ்ரி கூறுகையில், “பேச்சுவார்த்தைக்கு உட்பட்ட பகுதிகளில் ரோந்து மற்றும் விலங்கு மேய்ச்சல் நடவடிக்கைகள் 2020-ஆம் ஆண்டு இருந்த நிலைமைக்கு திரும்பும். படைகளை விலக்கிக் கொள்வது தொடர்பான முந்தைய உடன்படிக்கை குறித்து இந்தப் பேச்சுவார்த்தையில் விவாதிக்கப்படவில்லை. கடந்த சில ஆண்டுகளாக நிலுவையில் இருந்த பிரச்சினைகள் குறித்து உடன்பாடு எட்டப்பட்டது” என்றார்.

யுக்ரேன் போர் குறித்து மோதி கூறியது என்ன?

ரஷ்யாவின் கசான் நகரில் 16-வது பிரிக்ஸ் உச்சி மாநாடு நடைபெற்று வருகிறது.

மாநாட்டின் முதல் நாள், பிரதமர் நரேந்திர மோதிக்கும், ரஷ்ய அதிபர் விளாடிமிர் புதினுக்கும் இடையே இருதரப்பு பேச்சுவார்த்தை நடைபெற்றது. இது தவிர, இரான் அதிபரையும் பிரதமர் மோதி சந்தித்தார்.

ரஷ்யாவின் தலைமையில் அக்டோபர் 22-ஆம் தேதி முதல் 24-ஆம் தேதி வரை நடைபெறவுள்ள இந்த மாநாட்டில், பொருளாதார ஒத்துழைப்பு, காலநிலை மாற்றம், அனைவருக்கும் டிஜிட்டல் வசதி உள்ளிட்ட பல விவகாரங்கள் விவாதிக்கப்படும். மேலும் புதிய உறுப்பினர்களைச் சேர்ப்பதும் பரிசீலிக்கப்படும்.

பிரிக்ஸ் உறுப்பு நாடுகளின் தலைவர்களுடன் பிரதமர் நரேந்திர மோதி இருதரப்பு பேச்சுவார்த்தை நடத்துகிறார்.

புதினுடனான சந்திப்பின் போது, பிரதமர் நரேந்திர மோதி ரஷ்யா-யுக்ரேன் போர் குறித்து பேசினார். அமைதிக்கு தேவையான எந்த உதவியையும் செய்ய இந்தியா தயாராக உள்ளது என்று கூறினார். “ரஷ்யா மற்றும் யுக்ரேன் இடையேயான மோதல் குறித்து நாங்கள் தொடர்ந்து தொடர்பில் இருக்கிறோம். பிரச்னைகள் அமைதியான முறையில் தீர்க்கப்பட வேண்டும் என்று நாங்கள் நம்புகிறோம்.

அமைதி மற்றும் ஸ்திரத்தன்மையை விரைவில் மீட்டெடுப்பதை நாங்கள் முழுமையாக ஆதரிக்கிறோம். வரும் காலங்களில் சாத்தியமான அனைத்து ஒத்துழைப்பையும் வழங்க இந்தியா தயாராக உள்ளது” என்றார்.

இதற்கிடையில், ரஷ்ய அதிபர் விளாடிமிர் புதின் இரு நாடுகளுக்கும் இடையில் நடந்து வரும் திட்டங்கள் குறித்து விவாதித்தார். கசானில் இந்தியாவின் துணைத் தூதரகம் திறக்கப்பட்டதை வரவேற்றார்.

அதிபர் புதின் கூறுகையில், “எங்கள் முக்கிய திட்டங்கள் தொடர்ந்து முன்னேறி வருகின்றன. கசானில் இந்திய தூதரகத்தைத் திறக்கும் முடிவை நாங்கள் வரவேற்கிறோம். இந்தியாவின் தூதரக இருப்பு இருநாடுகளின் ஒத்துழைப்புக்கு பயனளிக்கும்” என்று கூறினார்.

“இந்தியாவும் ரஷ்யாவும் பிரிக்ஸ் அமைப்பின் நிறுவன உறுப்பினர்கள் ஆவர். இரு நாடுகளின் ஒத்துழைப்பு எங்களுக்கு மிகவும் முக்கியமானது. இரு நாட்டின் மக்கள் பிரதிநிதிகள், வெளியுறவு அமைச்சர்கள் தங்களுக்குள் நிலையான தொடர்பைப் பேணி வருகின்றனர், வர்த்தகத்திலும் நேர்மறையான வளர்ச்சி உள்ளது.” என்றார்.

இந்தியாவிற்கும் ரஷ்யாவிற்கும் இடையிலான உறவுகள் வேகமாக வளர்ந்துள்ளன என்றும், இந்தியா உடனான உறவுக்கு ரஷ்யா முக்கியத்துவம் அளிக்கிறது என்றும் புதின் வலியுறுத்தினார்.

இந்திய வெளியுறவு அமைச்சகத்தின் கூற்றுப்படி, இது கடந்த பத்து ஆண்டுகளில் பிரதமர் மோதியின் ஏழாவது ரஷ்ய பயணம் மற்றும் இந்த ஆண்டில் இரண்டாவது முறையாகும்.

யுக்ரேன் மோதல் மற்றும் மேற்கு ஆசியாவில் நிலவி வரும் பதட்டங்களுக்கு மத்தியில் நடைபெறும் இந்த உச்சிமாநாடு, மேற்கு அல்லாத நாடுகளின் வலிமையைக் காட்டுவதற்கான வாய்ப்பாக பார்க்கப்படுகிறது.

இந்தியாவின் வெளியுறவுச் செயலர் விக்ரம் மிஸ்ரி, இந்திய பிரதமருக்கும் ரஷ்ய பிரதமருக்கும் இடையிலான சந்திப்பின் போது பாதுகாப்பு, எரிபொருள்,அணுசக்தி உள்ளிட்ட விவகாரங்கள் குறித்து விவாதிக்கப்பட்டதாக கூறினார். மேலும் கூடங்குளம் அணு உலை திட்டத்தில் மீதமுள்ள மூன்று முதல் ஆறு அலகுகள் அமைப்பது குறித்தும் பொருளாதார ஒத்துழைப்பு குறித்தும் ஆலோசிக்கப்பட்டது என்றார்.

சபஹார் துறைமுகத் திட்டம் குறித்து இரானுடன் ஆலோசனை

இரானின் அதிபர் மசூத் பெசெஷ்கியனுடனான சந்திப்பில் சப்பார் துறைமுகம் குறித்தும் சர்வதேச வடக்கு தெற்கு போக்குவரத்து பாதை குறித்தும் பிரதமர் மோதி விவாதித்ததாக இந்திய வெளியுறத்துறை செயலாளர் கூறினார்.

மேலும் மேற்கு ஆசியாவில் மோசமடைந்து வரும் நிலைமை குறித்தும் விவாதிக்கப்பட்டது, இது குறித்து பிரதமர் மோதி கவலை தெரிவித்தார்.

புதிய உறுப்பினர்களை சேர்ப்பது குறித்தும் இந்த மாநாட்டில் விவாதிக்கப்படும்.

பத்திரிகையாளர் ஒருவரின் கேள்விக்கு பதிலளித்த வெளியுறவுச் செயலாளர், பிரிக்ஸ் விரிவாக்கத்தை இந்தியா எதிர்த்ததாக கூறப்படுவது முற்றிலும் தவறான தகவல் என்று கூறினார். கடந்த ஆண்டு பிரிக்ஸ் அமைப்பில் இணைந்த புதிய நாடுகள், அவர்களை இணைத்ததில் இந்தியாவின் பங்கைப் பாராட்டியதாக அவர் கூறினார்.

2006-ஆம் ஆண்டு பிரிக் என்ற அமைப்பு உருவாக்கப்பட்டது. பிரிக் (BRIC) என்பது பிரேசில் (B) ரஷ்யா ( R ) இந்தியா (I) , சீனா (C ) ஆகிய நாடுகள் கொண்டது. 2010-ஆம் ஆண்டு தென் ஆப்பிரிக்கா இணந்த பிறகு, பிரிக் என்பது பிரிக்ஸ் (BRICS)என்றானது.

இதன் நோக்கம் உலகின் முக்கியமான வளர்ந்து வரும் நாடுகளை ஒன்றிணைப்பதாகும். இதன் மூலம் வட அமெரிக்கா மற்றும் ஐரோப்பாவின் அரசியல் பொருளாதார சக்தி வாய்ந்த நாடுகளை எதிர்கொள்ள முடியும் என்று நம்பப்பட்டது.

எகிப்து, எத்தியோப்பியா, இரான், செளதி அரேபியா மற்றும் ஐக்கிய அரபு அமீரகம் ஆகிய ஐந்து நாடுகள் பிரிக்ஸ் அமைப்பில் சேர்க்கப்பட்டுள்ளன.

விரிவாக்கம் செய்யப்பட்ட பிரிக்ஸ் வலிமை பெறுமா?

பிரிக்ஸ் அமைப்பு விரிவாக்கம் செய்யப்பட்ட பிறகு, அதன் பெயர் என்னவாக இருக்கும் என்று தெரியவில்லை. இப்போதைக்கு ‘பிரிக்ஸ் ப்ளஸ்’ என்று அழைக்கப்படலாம்.

இந்த குழுவில் உள்ள நாடுகளின் மொத்த மக்கள் தொகை 3.5 பில்லியன், இது உலகின் மொத்த மக்கள் தொகையில் 45 சதவீதமாகும்.

இந்த உறுப்பு நாடுகளின் ஒருங்கிணைந்த பொருளாதாரங்களின் மதிப்பு 28.5 டிரில்லியன் டாலர் ஆகும். இது உலகப் பொருளாதாரத்தில் சுமார் 28 சதவீதமாகும்.

இரான், செளதி மற்றும் ஐக்கிய அரபு அமீரகத்தை கொண்டுள்ள பிரிக்ஸ் உலகின் மொத்த கச்சா எண்ணெயில் 44 சதவீதத்தை உற்பத்தி செய்கிறது.

உலகெங்கிலும் உள்ள அரசாங்கங்களுக்கு பணம் வழங்கும் உலக வங்கி போன்ற சர்வதேச அமைப்புகள் மேற்கத்திய நாடுகளின் ஆதிக்கத்தில் இருப்பதாக பிரிக்ஸ் உறுப்பினர்கள் கூறுகின்றனர்.

வளர்ந்து வரும் பொருளாதாரங்களின் முக்கிய குரலாகவும், பிரதிநிதியாகவும் பிரிக்ஸ் இருக்க விரும்புகிறது.

2014-ஆம் ஆண்டில், பிரிக்ஸ் நாடுகள் புதிய வளர்ச்சி வங்கியைத் தொடங்கின. 2022-ஆம் ஆண்டின் இறுதிக்குள், புதிய சாலைகள், பாலங்கள், ரயில் மற்றும் நீர் வழங்கல் திட்டங்களுக்காக வளர்ந்து வரும் நாடுகளுக்கு கிட்டத்தட்ட 32 பில்லியன் டாலரை வழங்கியுள்ளது.

இதுதான் பிரிக்ஸ் அமைப்பில் சீனாவின் முக்கிய இலக்கு என்று நிபுணர்கள் கருதுகின்றனர்.

பிரிக்ஸ் நாடுகளுக்கான தனி நாணயம் தேவையா?

டாலரின் ஆதிக்கத்தை குறைக்க, பிரேசில் மற்றும் ரஷ்யாவில் உள்ள அரசியல் தலைவர்கள் பிரிக்ஸ் நாடுகளுக்கு தனியாக ஒரு நாணயம் வேண்டும் என்று வலியுறுத்தினர். ஆனால் இது 2023-ஆம் ஆண்டு நடைபெற்ற பிரிக்ஸ் உச்சி மாநாட்டில் விவாதிக்கப்படவில்லை.

பிரிக்ஸ் நாடுகளுக்கு தனியாக நாணயம் உருவாக்கிக் கொள்வது எளிதானது அல்ல என்று நிபுணர்கள் கருதுகின்றனர். எனினும் எதிர்காலத்தில் சர்வதேச வர்த்தகத்துக்கு என தனியாக நாணயம் அல்லது கிரிப்டோகரன்சி பயன்படுத்துவதற்கு வாய்ப்பு இருக்கிறது என்றும் கருதுகின்றனர்.

டாலர் அல்லாமல் உள்ளூர் நாணயத்தை வர்த்தக்கத்துக்கு பயன்படுத்தினால் புவிஅரசியல் காரணமாக எழும் ஆபத்துகளை குறைக்கலாம் என்று ரஷ்ய அதிபர் புதின் செவ்வாய்கிழமை தெரிவித்திருந்தார்.

ரஷ்யாவுக்கும் அதன் முக்கிய வர்த்தக நாடான சீனாவுக்கும் இடையில் 95% பரிமாற்றங்கள் ரூபிள்ஸ் மற்றும் யுவானில் நடைபெறுகிறது என்று கடந்த ஆகஸ்ட் மாதம், ரஷ்ய பிரதமர் கூறியிருந்தார்.

யுக்ரேன் போர் காரணமாக ரஷ்யா மீது மேற்கு நாடுகள் பலவிதமான தடைகளை விதித்திருந்தனர்.

2022-ஆம் ஆண்டு யுக்ரேன் மீதான தாக்குதலுக்கு பிறகு, ரஷ்யாவின் 325 பில்லியன் டாலர் மதிப்பிலான சொத்துகளை ஜி7 நாடுகள் மற்றும் ஐரோப்பிய ஒன்றியம் முடக்கியது.

இவை ஒவ்வொரு ஆண்டும் மூன்று பில்லியன் டாலர் வட்டி ஈட்டக்கூடியவை ஆகும்.

– இது, பிபிசிக்காக கலெக்டிவ் நியூஸ்ரூம் வெளியீடு