கிழக்கு கொள்கலன் முனையம் திட்டம் ஒரு “விசேட திட்டமாக” பிரகடனம் ! on Tuesday, October 22, 2024
கொழும்பு தெற்கு துறைமுகத் திட்டத்தின் கிழக்கு கொள்கலன் முனையத் திட்டத்தை “விசேட திட்டமாக” பிரகடனப்படுத்துவதற்கு இலங்கை துறைமுக அதிகாரசபைக்கு அமைச்சரவை அங்கீகாரம் கிடைத்துள்ளது.
போக்குவரத்து, நெடுஞ்சாலைகள், துறைமுகங்கள் மற்றும் சிவில் விமானப் போக்குவரத்து அமைச்சரினால் முன்வைக்கப்பட்ட யோசனைக்கு அமைச்சரவை அங்கீகாரம் வழங்கியுள்ளது.
கொழும்பு தெற்கு துறைமுகத் திட்டத்தின் கிழக்கு கொள்கலன் முனையத்தை கட்டம் கட்டமாக அபிவிருத்தி செய்வதற்கும் அதிகாரசபையின் முழு உரிமையின் கீழ் கொள்கலன் முனையமாக செயற்படுவதற்கும் இலங்கை துறைமுக அதிகாரசபை 02-01-2021 அன்று நடைபெற்ற அமைச்சரவைக் கூட்டத்தில் அனுமதி வழங்கியுள்ளது.
அதன்படி, தற்போது சம்பந்தப்பட்ட பணிகளுக்கான ஒப்பந்தம் விடப்பட்டு, கட்டுமான பணிகள் நடைபெற்று வருகின்றன. மேலும், குறித்த கொள்கலன் முனையத்திற்கான கிரேன்கள் கொள்வனவு செய்வதற்கான கொள்முதலும் வழங்கப்பட்டுள்ளது.
கொழும்பு துறைமுகத்தின் தனியார் முனைய செயற்பாட்டாளர்கள் மற்றும் சேவை வழங்குநர்களுக்கு மூலோபாய அபிவிருத்திச் சட்டம் மற்றும் முதலீட்டுச் சபைச் சட்டத்தின் கீழ் பல்வேறு வரிச் சலுகைகள் வழங்கப்பட்டுள்ளன.
இந்த உண்மைகளை கருத்திற் கொண்டு கிழக்கு கொள்கலன் முனையத் திட்டம் ஒரு சிறப்புத் திட்டமாக அறிவிக்கப்பட்டதாக அமைச்சரவை முடிவுகளை அறிவிக்கும் செய்தியாளர் மாநாட்டில் இன்று (22) கலந்து கொண்ட அமைச்சரவை ஊடகச் செயலாளர் அமைச்சர் விஜித ஹேரத் தெரிவித்தார்.