தமிழக மீனவர்கள் விவகாரத்தை மனிதாபிமானத்துடன் அணுகுங்கள்.. இலங்கையில் கர்ஜித்த மோடி!Authored byபஹன்யா ராமமூர்த்தி | Samayam Tamil | Updated: 5 Apr 2025, 2:09 pm
தமிழக மீனவர் பிரச்சனைகளை உடனடியாக விடுவிக்க வேண்டும் என்றும் மீனவர்கள் விவகாரத்தை மனிதாபிமானத்துடன் அணுக வேண்டும் என்றும் பிரதமர் மோடி வலியுறுத்தியுள்ளார். Samayam Tamil
பிரதமர் மோடி இலங்கை செல்ல உள்ளார் என்றதுமே தமிழக மீனவர்கள் பிரச்சனை குறித்து பேசுவாரா என்ற எதிர்பார்ப்பு எழுந்தது. இந்நிலையில் நேற்று இரவு இலங்கை சென்ற பிரதமர் மோடி, இன்று காலை அதிபர் அநுர குமார திசநாயகவை சந்தித்து பேசுவார் என கூறப்பட்டது. இதையடுத்து இன்று மீனவர்கள் பிரச்சனை குறித்து பிரதமர் மோடி பேசுவாரா? மீனவர் பிரச்சனைக்கு நிரந்தர தீர்வு காணப்படுமா? என்று காலை முதலே எதிர்பார்த்து காத்திருந்தனர் மீனவர்கள். இந்நிலையில் இன்று இருநாட்டு உயர் அதிகாரிகள் முன்னிலையில் பேசிய பிரதமர் மோடி, மீனவர்கள் பிரச்சனை குறித்து பேசியதாகவும் தெரிவித்தார். அதாவது தமிழக மீனவர்கள் பிரச்சனையை மனிதாபிமானத்துடன் அணுக வேண்டும் என இலங்கை அரசிடம் வலியுறுத்தியதாக பிரதமர் மோடி தெரிவித்துள்ளார்.
மேலும் இலங்கை சிறையில் உள்ள தமிழக மீனவர்களையும் உடனடியாக விடுவிக்க வேண்டும் என்றும் அவர்களின் படகுகளை ஒப்படைக்க வேண்டும் என்றும் வலியுறுத்தியதாகவும் பிரதமர் மோடி தெரிவித்துள்ளார். மீனவர் விவகாரத்தில் மனிதாபிமானத்துடன் அணுக இரு நாடுகளும் ஒப்புக்கொண்டுள்ளதாகவும் பிரதமர் மோடி தெரிவித்துள்ளார்.
மேலும் தமிழ் மக்களின் கோரிக்கைகளை இலங்கை அரசு பூர்த்தி செய்யும் என நம்புவதாகவும் தெரிவித்துள்ளார். ஆனால் மீனவர்கள் சங்கத்தினர் மோடியின் இந்த பேச்சில் திருப்தி இல்லை என தெரிவித்துள்ளனர். தமிழக மீனவர்கள் பிரச்சனைக்கு பிரதமர் மோடி நிரந்தர தீர்வு காண்பார் என எதிர்பார்க்கப்பட்ட நிலையில் பிரதமர் மோடி இப்போதுள்ள பிரச்சனையை பற்றி மட்டுமே பேசியிருப்பதாகவும் இதனால் மீனவர்கள் பிரச்சனைக்கு நிரந்தர தீர்வு காணப்படுமா என்பது கேள்விக்குறிதான் என்றும் கூறியுள்ளனர்.
பிரதமர் மோடி 3 நாட்கள் அரசு முறைப்பயணமாக இலங்கை சென்றுள்ளார். நேற்று கொழும்பு விமான நிலையத்திற்கு சென்ற பிரதமர் மோடிக்கு அந்நாட்டு முறைப்படி பாரம்பரிய வரவேற்பு அளிக்கப்பட்டது. மேலும் ஐந்து முக்கிய அமைச்சர்கள் பிரதமர் மோடியை நேரில் சென்று வரவேற்றனர். இந்நிலையில் இன்று கொழும்பு சுதந்திர சதுக்கத்தில் பிரதமர் மோடியை இலங்கை அதிபர் அநுர குமார திசநாயக வரவேற்றார்.மேலும் பிரதமர் மோடிக்கு அந்நாட்டு சம்பிரதாயப்படி வரவேற்புகள் வழங்கப்பட்டன. ராணுவ அணிவகுப்பு மரியாதையும் பிரதமர் மோடிக்கு வழங்கப்பட்டது.
ஆசிரியர் பற்றிபஹன்யா ராமமூர்த்திசெய்தி சேனல், எஃப் எம் (RJ) மற்றும் டிஜிட்டல் ஊடத்துறையில் 13 ஆண்டுகள் அனுபவம். இதழியலில் முதுகலைப்பட்டம் பெற்றுள்ளேன். பொது செய்திகள், அரசியல், க்ரைம், விளையாட்டு சினிமா மற்றும் உலக நடப்பு செய்திகளில் அனுபவம்.. தற்போது சமயம் தமிழில் சினிமா செய்திகளை அளித்து வருகிறேன்…. மேலும் படிக்க