எகிப்து கடற்கரையில் செங்கடலில் சுற்றுலாப் பயணிகளை ஏற்றிச் சென்ற நீர்மூழ்கிக் கப்பல் மூழ்கியதில் ஆறு பேர் உயிரிழந்திருக்கலாம் என அஞ்சப்படுகிறது. குறைந்தது ஒன்பது பேர் காயமடைந்திருக்கலாம் என்று உள்ளூர் தகவல்கள் தெரிவிக்கின்றன.
பிரிட்டிஷ் மற்றும் ஜெர்மன் சுற்றுலாப் பயணிகளுக்குப் பிடித்தமான இடமான செங்கடல் கடற்கரையில் உள்ள ஹுர்காடா நகரத்தில் பல ஆம்புலன்ஸ்கள் சம்பவ இடத்திற்கு அனுப்பப்பட்டுள்ளன. சம்பவத்திற்கான காரணம் இன்னும் வெளியிடப்படவில்லை. ‘சிந்த்பாத்’ என்ற கப்பல் பல்வேறு நாடுகளைச் சேர்ந்த சுமார் 44 பயணிகளுடன் மூழ்கியதாக உள்ளூர் ஊடகங்கள் செய்தி வெளியிட்டுள்ளன.
காயமடைந்த ஒன்பது பேரில் நான்கு பேர் ஆபத்தான நிலையில் உயிருக்குப் போராடி வருவதாக மெட்ரோ செய்தி நிறுவனம் தெரிவித்துள்ளது. படகு மூழ்கிய சில நிமிடங்களில் குறைந்தது 29 பேர் மீட்கப்பட்டுள்ளனர்.
செங்கடலில் உள்ள பவளப்பாறைகளை ஆய்வு செய்வதற்காக இந்தக் குழு கடல் பயணத்திற்கு பணம் செலுத்தியதாக நம்பப்படுகிறது. ஆனால் ஹுர்கடாவில் உள்ள பிரபலமான ஹோட்டல்களில் ஒன்றின் மெரினாவின் முன் கப்பல் கவிழ்ந்ததாக அல் மஸ்ரி அல் யூம் மேற்கோள் காட்டிய வட்டாரங்கள் தெரிவித்தன.
செங்கடல் சுகாதார இயக்குநரகம் மற்றும் எகிப்திய ஆம்புலன்ஸ் ஆணையம் அதிகபட்ச எச்சரிக்கையுடன் வைக்கப்பட்டுள்ளதாக வட்டாரங்கள் உறுதிப்படுத்தியுள்ளன. மேலும் காயமடைந்தவர்களை மருத்துவமனைக்கு கொண்டு செல்ல 21 ஆம்புலன்ஸ்கள் சம்பவ இடத்திற்கு அனுப்பப்பட்டுள்ளன.
பாரம்பரிய நீர்மூழ்கிக் கப்பலைப் போலன்றி, இந்தப் படகுகள் முழுமையாக நீரில் மூழ்காது. மேலும் பயணிகள் கீழ் தளத்திலிருந்து கடல்வாழ் உயிரினங்களைக் கவனிக்க முடியும். அவை பல ஆண்டுகளாக இந்தப் பகுதியில் இயங்கி வருகின்றன.
2021 ஆம் ஆண்டில், ஹுர்காடா அருகே நீர்மூழ்கிக் கப்பல் விபத்தில் ஒரு ஜெர்மன் தம்பதியினரும் அவர்களது குழந்தையும் மூழ்கி இறந்தனர் நினைவூட்டத்தக்கது.