அதானி திட்டம் தோல்விக்கு காரணம் இலங்கை அரசுதான்.. குண்டைப் போட்ட ரணில் விக்கிரமசிங்க!Authored byபஹன்யா ராமமூர்த்தி | Samayam Tamil | Updated: 25 Mar 2025, 5:42 pm
இலங்கையில் அதானியின் புதுப்பிக்கத்தக்க எரிசக்தி திட்டத்தைப் பெற தற்போதைய அநுரகுமார திசநாயக்க தலைமையிலான அரசு தவறிவிட்டதாக முன்னாள் அதிபர் ரணில் விக்கிரமசிங்க குற்றம்சாட்டியுள்ளார். Samayam Tamilஇலங்கை முன்னாள் அதிபர் ரணில் விக்கிரமசிங்க சனிக்கிழமை தொலைக்காட்சி கலந்துரையாடல் நிகழ்ச்சியில் பங்கேற்றார். அதன் உரை தற்போது வெளியாகியுள்ளது. அதில் பேசியுள்ள ரணில் விக்கிரமசிங்க இலங்கையின் வளர்ச்சியை முன்னெடுக்க இந்தியாவுடன் பொருளாதார ஒத்துழைப்பை மேம்படுத்த வேண்டியது அவசியம் என வலியுறுத்தியுள்ளார். 2022 ஆம் ஆண்டில் தனது இரண்டு ஆண்டு பதவிக் காலத்தில், புதுப்பிக்கத்தக்க எரிசக்தி, விவசாயம் மற்றும் வர்த்தக தொடர்புகள் ஆகிய துறைகளில் தென்னிந்தியாவை மையமாகக் கொண்ட பொருளாதார கட்டமைப்பை முன்னெடுத்ததாகவும் தெரிவித்துள்ளார். மேலும் இந்தியாவுடன் பொருளாதார ஒத்துழைப்புக்கான பல வழிகளை தான் ஆய்வு செய்ததாகவும், துரதிர்ஷ்டவசமாக, தற்போதைய அரசு மன்னாரில் அதானியின் புதுப்பிக்கத்தக்க எரிசக்தி திட்டத்தைத் தொடரத் தவறிவிட்டது என்றும் குற்றம் சாட்டியுள்ளார்.
அதானி பசுமை எரிசக்தி திட்டத்தை மீண்டும் பேச்சுவார்த்தை நடத்த NPP அரசாங்கம் மேற்கொண்ட முயற்சியில் எந்த லாஜிக்கும் இல்லை என்றும் அவர் தெரிவித்துள்ளார். மேலும் தற்போதைய அரசின் இந்த நடவடிக்கை, அனைத்து இந்திய முதலீடுகளையும் மோசமாக பாதிக்கும் என்றும் ரணில் விக்கிரமசிங்க எச்சரித்துள்ளார்.
கடந்த பிப்ரவரி 13 ஆம் தேதி கவுதம் அதானியின் கூட்டு நிறுவனத்தின் புதுப்பிக்கத்தக்க பிரிவான அதானி கிரீன் எனர்ஜி, இலங்கையில் இரண்டு முன்மொழியப்பட்ட காற்றாலை மின் திட்டங்களில் இருந்து விலகுவதாக அறிவித்தது. இலங்கையின் புதிய அரசாங்கம் இது தொடர்பான கட்டணங்கள் குறித்து மீண்டும் பேச்சுவார்த்தை நடத்த முடிவு செய்ததைத் தொடர்ந்து அதானி குழுமம் இந்த அதிரடி முடிவை எடுத்தது.
அதானி நிறுவனம் தனுது இரண்டு திட்டங்களில் காற்றாலையிலிருந்து மின்சாரம் உற்பத்தி செய்வதிலும், அதை பயனர்களுக்கு எடுத்துச் செல்ல டிரான்ஸ்மிஷன் லைன்களை அமைப்பதிலும் நிறுவனம் மொத்தம் 1 பில்லியன் அமெரிக்க டாலர்களை முதலீடு செய்ய திட்டமிட்டு இருந்தது. மின்சாரச் செலவுகளைக் குறைக்க விரும்பிய அதிபர் திசாநாயக்கவின் அரசுக்காக இந்த திட்டம் செயல்படுத்தப்பட இருந்தது.
கடந்த ஆண்டு அதிபர் தேர்தலுக்கு முன்னதாக, வடகிழக்கு பிராந்தியத்தில் அதானி புதுப்பிக்கத்தக்க எரிசக்தி திட்டத்தை ரத்து செய்வதாக NPP கூறியது. அதிகாரத்தைப் பெற்ற பிறகு, முந்தைய விக்ரமசிங்கே நிர்வாகம் ஒப்புக் கொண்ட கொள்முதல் விலை அதிகம் என்றும் ஊழல் குறித்து சூசகமாக இருந்தது என்ற நிலைப்பாட்டைப் பிடித்துக்கொண்டு மீண்டும் பேச்சுவார்த்தை நடத்த அதிபர் அநுர திசநாயக்க அமைச்சரவை முடிவு செய்தது.
இதற்கு பதிலளித்த அதானி குழுமம், ஏற்கனவே ஐந்து மில்லியன் டாலர் செலவைச் செய்த பிறகு, 400 மில்லியன் அமெரிக்க டாலர் திட்டத்திலிருந்து மரியாதையுடன் விலக முடிவு செய்துள்ளதாக கூறிய அதானி, அந்த திட்டத்தை செல்படுத்தும் முடிவை திரும்பப் பெற்றார். ஏப்ரல் முதல் வாரத்தில் பிரதமர் நரேந்திர மோடி இலங்கைக்கு பயணம் செய்யவுள்ள நிலையில், இந்திய முதலீடுகள் குறித்த ரணில் விக்கிரமசிங்கவின் கருத்துக்கள் முக்கியத்துவம் வாய்ந்ததாக பார்க்கப்படுகின்றன.ஆசிரியர் பற்றிபஹன்யா ராமமூர்த்திசெய்தி சேனல், எஃப் எம் (RJ) மற்றும் டிஜிட்டல் ஊடத்துறையில் 13 ஆண்டுகள் அனுபவம். இதழியலில் முதுகலைப்பட்டம் பெற்றுள்ளேன். பொது செய்திகள், அரசியல், க்ரைம், விளையாட்டு சினிமா மற்றும் உலக நடப்பு செய்திகளில் அனுபவம்.. தற்போது சமயம் தமிழில் சினிமா செய்திகளை அளித்து வருகிறேன்…. மேலும் படிக்க